Atyraý oblysynda zeınetkerge shabýyl jasaǵan kúdikti ustaldy, dep habarlaıdy Aqshamnews.kz tilshisi.
Jylyoı aýdanyna qarasty Qosshaǵyl aýylynda múgedektigi bar zeınetker áıelge belgisiz adam shabýyl jasaǵan. Atyrau ONLINE málimetinshe, beıtanys áıel úıge basa-kóktep kirip, 62 jastaǵy áıeldiń betine sirke sýyn shashqan. Sonyń saldarynan zeınetker hımıalyq kúıik alyp, kórý qabileti nasharlaǵan.
Jábirlenýshiniń qyzynyń aıtýynsha, dárigerler alǵashqy kómek kórsetkenimen, naýqastyń jaǵdaıy aýyr bolsa da úıine jibergen. Al qaskóı altyn áshekeılerdi alyp, oqıǵa ornynan qashyp ketken.
Kúdikti ustaldy
Polısıanyń dereginshe, oqıǵa týraly habar 27 qazanda túsken.
"Belgisiz áıel úıge kirip, ótkir ıisi bar suıyqtyqty shashyp, altyn buıymdardy jymqyryp ketken. Jedel-izdestirý sharalary nátıjesinde 55 jastaǵy kúdikti anyqtalyp, ustaldy. Ol ýaqytsha ustaý ızolátoryna qamaldy," – dep málimdedi Atyraý oblystyq PD.
Zeınetkerge medısınalyq kómek kórsetilip, qazirgi tańda jaǵdaıy turaqty ekeni aıtyldy.
Tergeý júrgizilip jatyr
Atalǵan fakti boıynsha kúsh qoldana otyryp qaraqshylyq jasaý babymen sotqa deıingi tergeý bastaldy.
Polısıa turǵyndarǵa:
-
beıtanys adamdarǵa esik ashpaýǵa,
-
qarttardy baqylaýda ustaýǵa,
-
kúmándi jaǵdaılardy kórse 102-ge habarlasýǵa shaqyrdy.