Abaı oblysyndaǵy áıelder kolonıasynan alaıaqtyǵy úshin jazasyn ótegen 26 jastaǵy áıel bostandyqqa shyqty. Ony mekeme qaqpasynan Jetisý oblysynan arnaıy kelgen kúıeýi qarsy alyp, qos jubaıdyń saǵynysty sáti júrekterdi tebirentti, - dep habarlaıdy Aqshamnews.kz tilshisi.
Sot sheshimimen bes jylǵa bas bostandyǵynan aıyrý jazasy taǵaıyndalǵan áıel jazasyn óteý barysynda asqana bóliminde kómekshi aspaz bolyp eńbek etip, tártip pen jaýapkershilik tanytqan.
Jyldar boıy saǵynysqan erli-zaıyptylar qýanyshtan kóz jasyn tyıa almaı, uzaq qushaqtasyp turyp qaldy. Bul – tek bostandyqqa shyǵý emes, ananyń otbasy men balalaryna qaıta oralýy, jańa ómirdiń bastalýy edi.
Bostandyqqa shyqqan azamatsha mekeme ujymyna alǵysyn bildirip, jańa betburys jasaýǵa daıyn ekenin aıtty.
"Men úshin eń úlken baqyt - jaqyndarymnyń janymda bolýy. Osy kúndi talaı kúttim. Buryn vızajıst bolyp jumys istedim, endi súıikti isime qaıta oralǵym keledi. Túrme qabyrǵasynda ótken jyldar aýyr, biraq úlken sabaq boldy. Endigi maqsatym - balalarym men otbasym úshin jaryq ómir qurý", — dedi ol.
Kolonıa ákimshiligi de sottalǵan áıelderdiń qoǵamǵa beıimdelýi árdaıym nazarda ekenin atap ótti.
"Biz jazasyn óteýshilerdi tek kolonıada ǵana emes, bostandyqqa shyǵar aldynda da qoldaımyz. Eńbek etýge, jańa daǵdylar alýǵa jaǵdaı jasaımyz. Basty maqsat - olardyń jańa ómirge senimmen qadam basýy jáne ótken qatelikterdi qaıtalamaýy", - dedi №23 mekeme bastyǵynyń orynbasary Anar Sabıeva.
Jas ana endi jańa ómir paraǵyn otbasymen birge ashýǵa nıetti.