Nıderland Koróldiginiń astanasy – Amsterdam qalasyndaǵy Iýnýs Emre ınstıtýtynda Almaty qalasy mýzeıler birlestiginiń uıymdastyrýymen «Dástúr jalǵastyǵy: babalar amanaty» atty kórme ashyldy.
Ekspozısıa Almaty qalasy mýzeıler birlestiginiń qorynan alynǵan 70-ten astam biregeı eksponatty qamtıdy. Atalǵan kórme Uly dala mádenı murasyn Eýropa jurtshylyǵyna tanytatyn, qazaq rýhanıaty men tarıhynyń tereń tamyryn pash etetin mańyzdy mádenı oqıǵa.
Kórmeniń ashylýynda sóz sóılegen Qazaqstan Respýblıkasynyń Nıderlandy Koróldigindegi Elshisiniń keńesshisi Aıan Turarbekov:
«Bul kórme biz úshin erekshe mańyzǵa ıe boldy. Sebebi ol elimizdiń basty ulttyq merekesi – Qazaqstan Respýblıkasynyń Respýblıka kúnimen tuspa-tus keldi Ekspozısıa elimizdiń baı mádenı murasyn kórsetip, qazaq jáne túrik mádenıeti arasyndaǵy ózara dıalogtyń damýyna yqpal etedi. Almaty qalasy mýzeıler birlestigi men Iýnýs Emre ınstıtýtynyń tarıhı-mádenı murany saqtaý jáne álemdik deńgeıde tanytý baǵytyndaǵy eńbegine zor alǵys bildiremiz», – dedi ol.
Bes taqyryptyq bólimnen turatyn kórmede, qazaq halqynyń turmys-tirshiligi men qoldanbaly ónerin beıneleıtin etnografıalyq artefaktiler jáne qazaq, túrki halyqtarynyń mýzykalyq aspaptary usynylǵan.
«2023 jyly Almaty mýzeıler birlestigi «Túrki áleminiń eń úzdik mýzeıi» marapatyna ıe boldy. Qazirgi ýaqytta Almaty mýzeıi Eýropada qazaq mádenıetin dáripteý jáne tanytý baǵytynda birqatar jobany júzege asyryp keledi. Bul bastamalar ulttyq murany halyqaralyq deńgeıde keńinen nasıhattap, mádenı baılanystardy nyǵaıtýǵa yqpal etýde», – dep atap ótti TÚRKSOI halyqaralyq uıymynyń Bas hatshysy Sultan Raev.
Almaty qalasy mýzeıler birlestiginiń dırektory Lázzat Saǵyndyqova Almaty qalasy ákimi Darhan Amangeldiulynyń ystyq yqylasyn jetkize kele, bul kórme halyqaralyq yntymaqtastyqtyń jemisti nátıjesi ekenin atap ótti.
«Almaty qalasy mýzeıler birlestigi qala ákimdiginiń qoldaýymen keıingi úsh jylda, Ońtústik Koreıa (Seýl), Avstrıa (Vena), Fransıa (Parıj), Italıa (Neapol), Chehıa (Praga), Serbıa (Belgrad), Majarstan (Karsag), Túrkıada (Stambýl) 11 halyqaralyq kórme uıymdastyryp, qazaq halqynyń tarıhy men mádenıetin álemdik deńgeıde tanystyryp keledi. Amsterdamdaǵy bul kórme de – mýzeıdiń halyqaralyq baǵyttaǵy júıeli túrde júrgizilgen jumysynyń jalǵasy, qazaq mádenıetiniń Eýropa keńistigindegi jańa bir kórinisi», – dedi.
«Dástúr jalǵastyǵy: babalar amanaty» kórmesi Amsterdam qalasynda 14 qarashaǵa deıin jumys isteıdi.