Qazaqstanda qoǵamdyq oryndarda haıp úshin jasalatyn áreketter jıilegenine baılanysty İshki ister mınıstrligi azamattarǵa úndeý jasady, - dep habarlaıdy Aqshamnews.kz tilshisi Polisia.kz-ke silteme jasap.
"Laık jınaý úshin jasalǵan áreket batyldyq ta, kreatıv te emes"
Mınıstrlik ókili Shyńǵys Álekeshevtiń aıtýynsha, jaqynda jastardyń saýda ortalyqtarynda nemese kóshede jartylaı jalańashtanyp júgirip, aıqaılap, qoǵamdyq tártipti buzyp, otbasylar men balalarǵa qolaısyzdyq týǵyzǵan faktileri tirkelgen. Mundaı áreketter zańmen jazalanady. Máselen, jýyrda Astanada osyndaı tártip buzǵan azamat 15 táýlikke qamaldy.
"Laık jınaý úshin jasalǵan mundaı áreket batyldyq ta, kreatıv te emes. Bul – qoǵamdyq tártipti buzý, kópshilikke qurmetsizdik kórsetý, ar-uıatqa jat qylyq. Qoǵamdyq orynda jasalǵan kez kelgen zańǵa qaıshy nemese uıat áreketke jol berilmeıdi. Zańǵa sáıkes jaýapqa tartylady", - dedi Álekeshev.
"Ózińizdi de, aınaladaǵy adamdardy da qurmetteńizder"
İİM ókili qazaqstandyqtardy, ásirese jastardy, kúmándi ınternet-trendterge ermeýge shaqyryp, adamdyq qadir-qasıetti saqtaý qajettigin atap ótti. Mınıstrlik mundaı oqıǵalardy dereý toqtatatynyn jáne qoǵamdyq tártip pen qaýipsizdikti qadaǵalaýdy jalǵastyratynyn málimdedi.
"Barshaǵa, ásirese jastarǵa aıtarymyz: kúmándi ınternet-trendterge ermeńizder. Ózińizdi de, aınaladaǵy adamdardy da qurmetteńizder. Naǵyz qurmet pen abyroı jaqsy is, paıdaly oı, durys áreket arqyly keledi", - dedi resmı ókil.
Oqıǵa anyqtamasy
Eske salaıyq, 21 qazanda Astanada er adam saýda ortalyǵynda ishkıimmen júgirip, turǵyndardan ózine páter syılaýdy suraǵan. Vıdeoǵa qaraǵanda, ol Belarýs blogeri Mellstroy-dyń páter utysyna qatyspaq bolǵan.