"Alys sapar alǵashqy qadamnan bastalady" deıdi halyq danalyǵy. Osy sózdiń mánin Rolan Anatolıı óz isimen dáleldep keledi. 18 jastaǵy jigit Shymkentten Mekkege deıingi 8000 shaqyrym joldy velosıpedpen eńserýdi maqsat etken. Capar jaıly Aqshamnews.kz tilshisi tolyǵyraq baıandaıdy.
Rolan 13 qazanda jolǵa shyqqan. Qazir uzaq sapardyń 19 kúnin eńserdi.
Shymkent - Túrkistan - Qyzylorda - Aqtóbe - Atyraý - Astrahan - Mahachkala - Groznyı - Tbılısı - Tegeran - Dýbaı - Doha - Er-Rıad - Medına - Mekke baǵytyn betke alǵan ol qazir Daǵystan arqyly ótip, Babaıýrt pen Mahachkala qalalaryn artta qaldyrǵan.
Saparǵa shyqqan jas jolaýshynyń barlyq qajet jabdyǵy: shatyr, qural-jabdyq, azyq-túlik pen kıim-keshegi senimdi serigi - velosıpedine tıelgen. Mundaı aýyr júkpen joldy eńserý de ońaı emes. Ol kúnine 80-100 shaqyrym joldy artqa tastap keledi. "Jol azabyn júrgen biler" demekshi, shatyryn tige sap jol boıynda túnegen kezderi de az emes kórinedi.
Ár kúnin ol áleýmettik jelidegi paraqshasyna júktep, ózine tileýles oqyrmandarymen sapar baǵyty men odan alǵan áserin bólisip otyrady.
"Bul sapar - ózimdi synaý, shydam men erik-jigerdiń mektebi. Álemdi óz kózimmen kórip, jańa adamdarmen tanysqym keledi", – deıdi ol.
Kók týyn jelbiretken jolaýshy
Rolan velosıpedine qazaqtyń kók baıraǵyn ilip alǵan. Jolda kezdesken adamdar oǵan jyly lebizderin bildirip, qoldan kelgen kómegin kórsetip jatyr. Biri asyn berse, biri aqsha nemese jyly sózben demep, tilekterin jaýdyrady. Keıbir eldi meken turǵyndary onyń áleýmettik jelidegi jazbalaryn kórip, arnaıy jolyn tosady eken.
Qazir Rolan Kavkaz óńirin artqa tastap, aldaǵy ýaqytta Ázerbaıjan men Túrkıa arqyly jolyn jalǵastyrmaq. Dittegen jerge qoldan kelse, 2-3 aı kóleminde jetýge nıetti.
Aıta keteıik, bul Rolannyń mundaı saparǵa alǵash ret shyǵýy emes. Byltyr ol jaıaý júrip, bar bolǵany bir aıda 1300 shaqyrymdy eń artqa tastap, Túrkıaǵa deıin baryp-qaıtqan. Sol sapardan keıin saıahat onyń ómiriniń bir bóligine, ıaǵnı súıikti isine aınalǵan.
Qazirgideı ushaq ushyp, kóliktiń túr-túri aıshylyq alys jerge jyldam jetkizetin zamanda Rolan sıaqty jastardyń óz kúshimen alys saparǵa shyǵýy tabandylyq pen rýhanı izdenistiń úlgisi ispetti. Onyń erik-jigeri men batyldyǵy kópshilikke shabyt berip otyr. "Jol muraty - jetý" bolsa, qasıetti meken - Mekkege attanǵan jigit bul maqsatyna jetetinine kámil senedi.