Prezıdent Qasym-Jomart Toqaev «Qazaqstan – akademıalyq bilim berý aýmaǵy» strategıalyq seriktester forýmynda sóılegen sózinde elimizde ChatGPT negizindegi bilim berý quraldaryn engizý boıynsha pılottyq joba iske qosylǵanyn málimdedi, - dep habarlaıdy Aqshamnews.kz tilshisi Aqordaǵa silteme jasap habarlaıdy.
Qasym-Jomart Toqaev bilim-ǵylym salasyna salynǵan ınvestısıa Qazaqstannyń jarqyn bolashaǵyna qaraı jasalǵan qadam ekenin, aldymyzda ekonomıkany jańǵyrtý, jańa óndiris sektorlaryn qalyptastyrý, jasandy ıntellekt tehnologıalaryn barlyq salaǵa engizý jáne Qazaqstandy tolyqqandy sıfrlyq memleket retinde damytý maqsattary turǵanyn jetkizdi.
"Qazaqstan tehnologıasy ozyq el bolýǵa nyq qadam basty. Bul – bizdiń jańa ulttyq bolmysymyzdyń asa mańyzdy bóligi dep aıtsaq, qate bolmaıdy. Búgin spıkerler jasandy ıntellektiniń jahandyq ortaq progresti órge súıreıtin jańa qozǵaýshy kúsh retindegi róline basa mán berdi. Shyn máninde, osy biregeı tehnologıanyń arqasynda adamzat alǵa qaraı qaryshty qadam jasaı alady. 2030 jylǵa qaraı JI álemdik İJÓ kólemin 15 trıllıon dollardan asa ulǵaıtady dep boljanyp otyr. Biraq jasandy ıntellektiniń damýynan eń kóp paıdany qaı el kóredi? Bul – óte qyzyqty saýal. Ony tereń zerdelep, saraptaý qajet. Jaýaby asa qıyn kórinbegenimen, bul másele adamzat keleshegimen tikeleı baılanysty ekenin moıyndaýymyz kerek. Qazaqstanda jasandy ıntellektini damytý jáne basqa salalarmen jan-jaqty ıntegrasıalaý eń joǵary strategıalyq basymdyq sanalady. JI sarapshylary men mamandaryn daıarlaý isine aıryqsha mán berip otyrmyz. Osy maqsatta jyl basynan beri AI Sana baǵdarlamasyn iske qostyq. 540 myńnan astam stýdent oqý kýrsynan ótti. Budan bólek, jasandy ıntellekt barlyq mektep pen ýnıversıtetke mindetti kýrs retinde engizildi. Elimizde Jasandy ıntellekt ýnıversıtetin ashý úshin daıyndyq jumystary júrgizilip jatyr", – dedi Prezıdent.
Osy oraıda Memleket basshysy qyrkúıek aıynda AQSH-qa jasaǵan sapary kezinde OpenAI kompanıasymen mańyzdy ýaǵdalastyqqa qol jetkizilgenin eske saldy.
"Nátıjesinde Qazaqstan ChatGPT negizinde bilim berý quraldaryn engizý jónindegi pılottyq jobany júzege asyra bastady. Atalǵan bastamalar arqyly otandyq bilim berý salasynda jasandy ıntellekt áleýetine súıene otyryp, keshendi sıfrlyq transformasıa jasalyp jatyr", – dedi Qasym-Jomart Toqaev.