Almaty qalasynda «Baýyrsaq Fest – 2025» respýblıkalyq festıvali ótti. Halyqaralyq aspazdar kúni qarsańynda ári «Jumysshy mamandyqtar jyly» aıasynda ótken is-shara qalalyq Bilim basqarmasyna qarasty «Almaty tehnologıalyq koleji» bazasynda uıymdastyryldy.
Jyl saıyn dástúrge aınalǵan festıváldiń basty maqsaty – ulttyq taǵammen qosa, salt-dástúrdi nasıhattaý deıdi Almaty tehnologıalyq kolejiniń dırektory Erulan Qaraǵulov. «Bıyl Memleket basshysynyń jarıalaǵan «Jumysshy mamandyqtar jyly» aıasynda Tamaqtaný jáne qyzmet kórsetý mamandyqtaryndaǵy kadrlar sany kóbeıip jatyr. Osy dástúrdi ary qaraı jalǵastyrý – bizdiń basty paryzymyz», – dedi kolej dırektory.
«Baýyrsaq Fest – 2025» festıvali ulttyq taǵamdar men qonaqjaılylyqty nasıhattap qana qoımaı, qatysýshylardyń kásibı sheberlik deńgeıin jáne kásip bedelin arttyrdy ári kolejder men áleýmettik seriktester arasyndaǵy baılanysty nyǵaıta tústi.
Atalmysh baıqaý bıyl jetinshi ret ótip otyr. Almaty tehnologıalyq kolejiniń oqý-óndiristik isi boıynsha dırektordyń orynbasary Gúlnár Júnisbekqyzynyń sózinshe, festıvál alǵashynda aýdandyq, keıin qalalyq deńgeıde uıymdastyrylsa, byltyrdan beri respýblıka boıynsha ótkizilip keledi.
Gúlnár Júnisbekqyzynyń aıtýynsha, kezekti baıqaýǵa 11 kolej qatysqan. Jýyrda oqý orny «Baýyrsaq Fest»-tiń logotıp patentin, ótkizilý erejesiniń avtorlyq quqyǵyn aldyq. Qazirge memleket tarapynan qarjylyq qoldaý bolmaǵanymen, Áýezov aýdany ákimdigi belsendi qoldaý kórsetip keledi.
Qazaq halqynyń aspazdyq óneri ǵasyrlardan kele jatqan ulttyq dástúrge baı. Qazaq dastarhany qashan da ózindik ereksheligimen, dámimen tanymal. Halqymyzben dámdes bolǵan saıahatshylar ulttyq taǵamdardy nárli jáne dámdi, qarapaıym jáne talǵampaz, taǵamdardyń ártúrliligi men sırek úılesimimen, sondaı-aq uzaq ýaqyt boıy este qalǵan qonaqjaılylyǵyn tańdana eske alady.
Klasıkalyq «Baýyrsaq», «Shı baýyrsaq», avtorlyq «Baýyrsaq» jáne «Art-ústel» atalymdarynan turǵan festıvál barysynda konserttik baǵdarlama usynyldy. Qatysýshylardy kásibı naýbaıhana jáne kondıterlik tehnologtardan turatyn quzyretti qazylar alqasy baǵalady.
«Baýyrsaq Fest» jyldan-jylǵa órkendep kele jatyr. Bastapqyda 6 top qana baq synasqan baıqaýǵa qazir 6 óńirden, Almatynyń 4 kolejinen qatysýshylar keldi. Bul – dástúrdi jalǵastyrýdyń aıqyn kórinisi. Avtorlyq «Baýyrsaq» – ár qatysýshynyń derbes ári óz oıynan daıyndalatyn ónim. Al «Art-ústelde» kórnekilikke basa nazar aýdarylady. Baǵalaý kezinde ydystarǵa, daıyndalǵan ónimderge, tazalyqqa, taqyrypqa sáıkestiligine, baýyrsaqtyń quramyna, pisken kezdegi kúıine, pishinine nazar salamyz. Qatysýshylar júldeli oryndardan bólek túrli atalym boıynsha marapattalady, – dedi «Qulpynai» kondıterlik úıiniń bólim meńgerýshisi Elmıra Darybaeva.
Nabıra JUMABAIQYZY, «Progres» polıtehnıkalyq kolejiniń sheberi:
Baýyrsaq – qazaqtyń ata-babadan kele jatqan ulttyq taǵamy. Sondyqtan «Baýyrsaq Fest» atty festıváldiń uıymdastyrylýyn quptaımyn. Ulttyq oıyndarymyz ben ulttyq taǵamdarymyz keńinen nasıhattalǵanyn qalaımyn. Óıtkeni, dástúrimiz Qazaqstannyń damýyna, jastardyń órkendeýine jol ashady. Festıválge ekinshi ret qatystyq. Byltyr da atalmysh baıqaý óz deńgeıine sáıkes ádil ótti. Nan ónimderin túrlendirgenimizdiń arqasynda «Art-ústelimiz» ekinshi oryndy ıemdendi. Uıymdastyryýshylarǵa sheksiz alǵys aıtamyn.
Saltanat BOTABEKQYZY, baıqaýǵa qatysýshy:
"Jambyl oblysy ákimdigi Bilim basqarmasynyń «№3 Baızaq kolejinen» 4 qatysýshy keldik. Baıqaýǵa baýyrsaq pisiretin arnaıy tamaqtandyrýdy uıymdastyrý mamandyǵynyń óndiristik oqytý sheberleri qatysty. Boıda qobaljý bolǵanymen, barynsha daıyndaldyq"
