Qyrǵyz bıligi burynǵy prezıdent Kýrmanbek Bakıevti jáne eks-premer Sapar Isakovty elge qaıtarý máselesin belsendi túrde talqylaýda. Bul týraly Aqshamnews.kz saıty habarlaıdy.
Qyrǵyzstan prezıdenti Sadyr Japarov «Kabar» agenttigine bergen suhbatynda Reseı men Belarýs bul saıası tulǵalardy ekstradısıalaýǵa daıyn ekenin, alaıda basty shart – olardy túrmege qamaýǵa bolmaıtynyn málimdegenin aıtty.
"Biz bul másele boıynsha oılanýdamyz. Múmkin aldymen Sapar Isakovty elge ákelip, ony jylý elektr ortalyǵyn jańǵyrtý men mýzeıdi qaıta qurý kezindegi sybaılas jemqorlyqqa qatysty tergeý kerek shyǵar? Ol kim qansha aqsha alǵanyn ashyq aıtýy tıis", – dedi Japarov.
Sonymen qatar, eks-prezıdent Bakıevtiń qarjylyq aktıvteri men joǵalǵan altyn konsentraty da tergeýge alynatyny belgili boldy.
"Biz ony 2010 jylǵy sáýir jáne maýsym oqıǵalarynyń ekinshi taraby retinde tyńdap, bul iske sońǵy núkte qoıa alar edik. Halyq 15 jyldan beri olardyń qaıtarylýyn talap etip keledi", – dep tolyqtyrdy memleket basshysy.
Japarov Bakıevtiń uly Maksım Bakıev pen inisi Janysh Bakıevke qatysty da pikir bildirdi. Eger olar Qyrǵyzstanǵa oralsa, birden túrmege toǵytylatynyn basa aıtty.
"Maksım Bakıev elge kelse, biz ony qamaýǵa alyp, mıllıardy qaıtaryp alar edik", – dep málimdedi prezıdent.
Kýrmanbek Bakıevtiń Qazaqstan arqyly qashýy jáne sot úkimi
2010 jyly sáýir aıynda bolǵan revolúsıanyń nátıjesinde Kýrmanbek Bakıev bılikten taıdyrylyp, Qazaqstanǵa Nursultan Nazarbaevtyń kómegimen qashyp kelgen. Keıin ol Belarýsten baspana alyp, sol elde turaqtady.
Qyrǵyzstan soty ony 2010 jyly mıtıńke shyqqandardy atqyzǵany úshin 30 jylǵa bas bostandyǵynan aıyrý jazasyna syrttaı kesken bolatyn.
Qazirgi tańda Qyrǵyzstan bıligi Bakıevter áýletiniń elge qaıtýyn uıymdastyrýǵa tyrysyp jatyr, alaıda bul prosestiń qalaı júzege asatyny belgisiz.