Almaty ákimi Erbolat Dosaev Naýryzbaı aýdany turǵyndarymen kezdesý barysynda aýdan halqyn turaqty sýmen qamtý jáne káriz júıesimen qamtamasyz etý basym baǵyttyń biri ekenin atady, dep habarlaıdy almaty-akshamy.kz
Qalaǵa qosylǵan biraz aýmaqta saıajaı men baý-baqsha seriktestikteri ornalasqan. Bir kezderi munda jyl boıy paıdalanýǵa arnalmaǵan jeliler salyndy. Sonyń nátıjesinde shaǵyn aýdandardyń turǵyndaryn turaqty túrde sýmen qamtýda qıyndyq týyndady.
Osyǵan baılanysty aýdanda turǵyndardy turaqty sýmen jáne sý burý jelilerin qamtamasyz etý boıynsha jumystar qolǵa alynǵan. Bıyl shildede ortalyqsyzdandyrý aıasynda aýdan ákimdigi Aqjar jáne Qaraǵaıly shaǵyn aýdanynda 90 km jańa sýmen qamtý jáne sý burý jelilerin salý jumystaryn bastady. Bul maqsatqa 3,5 mlrd teńge bólindi. Jumysty 2025 jyldyń qazan aıyna deıin aıaqtaý josparlanǵan.
Aýdannyń ońtústik bóliginiń turǵyndary Qarǵaly men Aqsaıdyń eki negizgi sý kózderinde sý laılansa sýdyń berýi shekteledi. Bul máseleni sheshý úshin «Qarǵaly» sý jınaǵyshyn salý týraly sheshim qabyldandy. Qazir sý jınaǵysh, magıstraldyq sý qubyry, sý daıyndaý stansıasy jáne súzgi stansıasynyń qurylysy syndy qurylystyń 1 kezeńi aıaqtaldy.
Ekinshi kezeńde sý tartýdy tolyq iske qosý úshin uzyndyǵy 6,5 km jańa káriz kolektorynyń qurylysyn aıaqtaý josparlanǵan. Bıyl qyrkúıek aıyna deıin bitirý kózdelgen. Bul aýdannyń 50 myńnan astam turǵynyn sýmen turaqty qamtamasyz etýge jol ashady.
Sondaı-aq, Naýryzbaı aýdanynyń batys bóliginiń 150 myń turǵynyn jáne Almaty oblysynyń eki aýylyn sapaly sýmen qamtamasyz etetin «Aqsaı» sý jınaǵyshynyń qurylysy júrgizilip jatyr. Jobany 2025 jyldyń qarasha aıynda aıaqtaý kózdelgen, qazirgi ýaqytta jumys 55% bitti.
Buǵan qosa, osy jyldyń qyrkúıek aıynda Tastybulaq jáne Taýsamaly shaǵyn aýdandarynda ınjenerlik jeliler salý jobasy boıynsha memlekettik saraptama qorytyndysy shyǵady. Qurylys-montajdaý jumystaryn 2025 jyldyń kókteminde bastap, 2026 jyldyń II toqsanynda aıaqtaý josparlanǵan.