Jyl boıy ótip jatqan «Taza Qazaqstan» respýblıkalyq ekologıalyq aksıasy aıasynda Almatynyń Naýryzbaı aýdanynda kóptegen jumystar atqarylyp keledi.
Atap aıtqanda, «Taza Qazaqstan» respýblıkalyq ekologıalyq aksıasy jáne «Jasyl aýla» bastamasy aıasynda «Alem City 3» turǵyn úı kesheninde 400 kompensasıalyq aǵash otyrǵyzyldy, dep habarlaıdy aqshamnews.kz.
Bul shara aýdan aýmaǵyn kógaldandyrýǵa, ekologıalyq jaǵdaıdy jaqsartýǵa jáne jaıly ári jasyl qalalyq orta qalyptastyrýǵa baǵyttalǵan. Sonymen qatar, «Shuǵyla» turǵyn úı kesheninde senbilik uıymdastyrylyp, onyń aıasynda shóp shabý, qoqys jınaý, trotýarlar men joldardy sypyryp, jýý, sondaı-aq qurylys jumystarynan keıin qalǵan tastardy shyǵarý jumystary atqaryldy.
Sondaı-aq, Naýryzbaı aýdany «Tazalyqty barlyǵy baqylaıdy» chellendjin Túrksib aýdany kásipkerlerinen qabyldap, aýdan aýmaǵynda senbilik uıymdastyrdy. Aýdan aýmaǵyn tazalaý boıynsha nátıjeli jumystan keıin estafeta Bostandyq aýdanyna joldandy. Al ótken kúnderi «Taza Qazaqstan» respýblıkalyq ekologıalyq aksıasy men «Jarqyn kúz» ekoaksıasy aıasynda «Aqjar» shaǵynaýdanynda jergilikti senbilik ótti. Oǵan barlyǵy 12 jumysshy men 3 arnaıy tehnıka jumyldyryldy.
Jaz kezinde «Almaty – bárimizdiń ortaq úıimiz» ekologıalyq naýqany aıasynda Naýryzbaı aýdanynda jıi senbilikter ótken bolatyn. Shilde aıynda ótken aýqymdy senbilikterdiń birine 170 adam qatysyp, Saq qorǵandary saıabaǵyn qosa alǵanda, 4 gektar aýmaqqa 200 aǵash otyrǵyzyldy. Barlyǵy aýdan boıynsha búginge deıin 5000 aǵash otyrǵyzylsa, onyń 4000-y ótemdik, al 1000-y bastamashyldyq negizde boldy.
Sonymen qatar, «Barlyq» bazarynyń aldynda buryn bos jatqan aýmaqty abattandyrý jumystary júrgizile bastady. «Munda beı-bereket saýdanyń aldyn alý úshin qorshaýlar ornatylyp, aǵashtar men butalar otyrǵyzylady, jáne avtomattandyrylǵan sýarý júıesi ornatylady», – dep jazdy áleýmettik jelide Naýryzbaı aýdanynyń ákimi Nazıra Toǵyzbaeva.
Aıta ketken jón, Naýryzbaı aýdanynda qoqys alańdary men jáshikterdi jýý jáne zalalsyzdandyrý jumystary apta saıyn júrgizilip keledi. Bul jumystar sanıtarlyq jaǵdaıdy jaqsartýǵa jáne qoǵamdyq oryndarda tazalyqty saqtaýǵa baǵyttalǵan. Bekitilgen keste boıynsha qoqys alańdary aptasyna bir ret jýylady. Alaıda, jazdygúni tazalaý jıiligi 2-3 retke deıin artty. Mundaı sharalar jaǵymsyz ıis pen lastanýdyń aldyn alýǵa múmkindik berdi.
Qazirgi ýaqytta aýdan ákimdigi qys kezindegi tazalyqqa da daıyn ekenin habarlady. Ákimdik málimetinshe, aýdan aýmaǵyn qardan tazalaý jumystaryna úsh merdiger uıym jaýapty. Qajetti materıaldar, sonyń ishinde 8000 tonna qum men tuz, arnaıy tehnıkalar alynǵan. Al ótken kúnderi qarly aýa-raıy kezinde tazalaý jumystaryna 38 birlik arnaıy tehnıka jáne 36 jol jumysshysy jumyldyrylyp, 137 tonna qospa jáne 32 tonna tuz paıdalanyldy.