Almatydaǵy Mahatma Gandı saıabaǵy jóndeýden keıin adam tanymastaı ózgerip sala berdi. Búginde saıabaq mańaıda turatyn almatylyqtardyń, ásirese, zeınetkerler men jas analardyń, sonymen qatar stýdentterdiń súıikti demalys ornyna aınalǵan.
Almaly aýdany ákimdiginiń habarlaýynsha, ótken jyly Gandı atyndaǵy saıabaqta qaıta jóndeý jumystary júrgizilgen. Jaıaý júrginshiler aımaǵynyń boıynda yńǵaıly demalý úshin átkenshekter, oryndyqtar qoıylǵan. Ashyq aýada áýesqoılar úshin shatyr astyndaǵy trenajerlarmen birinshi dárejeli aımaq jasaldy. Ol jerde kez-kelgen aýa-raıynda sportpen aınalysýǵa bolady. Tenıs oınaýǵa arnalǵan ústelder, yńǵaıly júgirý joldary bar. Jaıaý júrginshiler joldary asfálttalyp, keńeıtildi. Shahmat nemese ústel oıyndaryn stıldi jańa jaryqtandyrylǵan úıshikterde oınaýǵa bolady. Kishkentaı balalarǵa arnalǵan Oıyn alańy salyndy. Saıabaqtyń ortasynda, Gandı eskertkishiniń janynda brýschatka tolyǵymen jańartyldy. Saıabaq jańaryp, jaqsarǵannan keıin munda demalýǵa kelýshilerdiń sany arta túsken. Búginde parkke kún saıyn shamamen eki myńnan astam adam keledi.
Aıta keteıik, M.Gandı atyndaǵy saıabaǵyn abattandyrý jurystary bir aı ishinde «Halyq qatysatyn búdjet» baǵdarlamasy aıasynda júrgizildi. Jańǵyrtý jumystaryna jergilikti búdjetten 200 mln teńge qarajat bólingen.
Jańarǵan demalys aımaǵyn kórýge barǵan tilshilerdiń nazaryna átkenshekterde balalaryn oınatyp júrgen ájeı anadaıdan kózge tústi. Ózin Aǵaısha dep tanystyrǵan ájeı nemeresin oınatyp júr eken.
– Oı, aınalaıyndar, myna saıabaq jannyń rahaty boldy. Kelin-bala jas, jumystaryn istesin. Men mine, nemeremdi ózim qaraımyn. Saıabaqty jóndegeli beri osy jerden shyqpaımyz. Munda barlyǵy bar. Ózim de demalamyn, nemereme de qyzyq. Keıde ózim qatarly jandarmen otyryp áńgime-dúken quramyz. Zerikpeısiń degenim ǵoı. Saıabaqty zamanyna qaraı, tamasha jasapty. Barlyq jaǵdaı bar munda. Bizge budan artyq ne kerek deısiń, qaraǵym. Eńbekteriń jemisti bolsyn! Almatymyz kórkeıe bersin! – deıdi Aǵaısha ájeı.
Sál júrgenimizde oryndyqta otyrǵan bir top jasty kezdestirdik. Olar da saıabaqtyń qala turǵyndaryna, ásirese jastar úshin qolaıly jasalǵanyn jarysa aıtyp berdi.
– Saıabaqta jastar úshin de jaǵdaı jasalǵan eken. Keıde sabaqtan bos ýaqytymyzda qaıda bararymyzdy bilmeı ketetinimiz bar. Myna jer quddy bir biz úshin jasalǵandaı. Usaq-túıekke deıin mán berilipti. Birneshe jerde bıotýalet ornatylypty. Ol da másele ǵoı, áıtpese. Bir baıqaǵanymyz, munda tazalyq pen tártipke qatty mán berilgen. Jumysshylar jerge japyraq túsirmeı jınap alyp otyrady eken. Qarańyzshy, aınalamyz tap-taza! Mundaı jerde ómir súrýdiń ózi baqyt qoı!
Aıta keteıik, M.Gandı atyndaǵy saıabaq HH ǵasyrdyń 70-jyldarynyń basynda salynǵan. 2003 jyldyń qazan aıynda saıabaqtyń shyǵys bóliginde úndi halqynyń saıası jáne qoǵam qaıratkeri Mahatma Gandıge eskertkish qoıylǵan. Keıin eskertkish ornatylǵannan soń saıabaq sol tulǵanyń qurmetine oraı qazirgi ataýyn alǵan.