Elimizde kóktemnen beri «Taza Qazaqstan» jalpyulttyq ekologıalyq aksıasy uıymdastyrylyp, onda qala aýmaǵyn abattandyrý, kógaldandyrý, kóshelerdi tazartý sekildi tazalyq sharalary ótkeni barshańyzǵa málim.
Memleket basshysy Qasym-Jomart Toqaevtyń tapsyrmasy aıasynda qolǵa alynǵan ıgi bastamany almatylyqtar da qýana qabyldady. Ekologıalyq aksıada qala turǵyndary men eriktileri ózenderdi, saıabaqtardy, kóshe boılaryn jáne tabıǵı aýmaqtardy tazartý jumystaryna belsene qatysyp, qala ekologıasyn jaqsartýǵa úles qosýda.
– Almatyda kóktemnen bastap jaz boıy ekologıalyq túrli is-sharalar ótti. Óz basym solardyń birnesheýine erikti retinde qatystym. Almaty – sheteldik qonaqtar qyzyǵa qaraıtyn ásem qala ǵoı. Sondyqtan biz ózimiz turatyn jumaq mekendi taza ustaýǵa mindettimiz! Árkimge ózi ómir súretin, turatyn jeri qymbat! Men úshin Almatyǵa jetetin jer joq. Almaty jyl ótken saıyn jasaryp, kún ótken saıyn qulpyryp keledi. Jazda tipti keremet! Jasyl jelegi men qyzyl-jasyl gúlderi jaıqalǵanda, Almaty ajarlana túsedi. Árıne, munyń barlyǵy tynymsyz eńbekti, úzdiksiz tazalyqty talap etedi. Biz tańerteń jumysqa kele jatqanda sary tústi kúrteshe kıip, qoldaryna sypyrtqy, kúrek ustaǵan tazalyqshylardy kúnde kóremiz. Biraq, biz olardyń jumysyn áli de baǵalaı almaı kelemiz. Shyndap kelgende, Almatymyzdyń tap-taza bolyp turǵany tańmen talasa oıanyp, iske kirisetin sol jandardyń eńbegi! – deıdi Almaly aýdanynyń turǵyny Nurgúl Qoıshybekova.