Búgin megapolıste aýqymdy senbilik ótti. "Taza Qazaqstan" ekologıalyq baǵdarlamasynyń kezekti maýsymy aıasynda aǵash otyrǵyzatyn aýmaqtar belgilenip, kósheler, qoǵamdyq keńistikter, parkter, saıabaqtar, jaǵalaý aımaqtary men sý aıdyndary tazartyldy. İske volonterler, jastar, qoǵam belsendileri, mádenıet jáne sport qaıratkerleri tartyldy.
Negizgi sanıtarlyq jumystar "Dostyq" parkinde ótti. Bul oryn turǵyndardyń ótinishine baılanysty arnaıy tańdalǵan.
Eko-belsendi Evgenıı Muhamedjanov ta tazalyq sharasyna qatysyp, ekinshi ret óńdeýge bolatyn shıkizatty (qaldyqtardy) óńdeý jobalaryn tanystyrdy.
"Biz adamdarǵa ekologıa týraly aıtyp júrmiz: kún saıyn qoqysty suryptaýdy ádetke aınaldyrý qajet. Keshendi jumys kerek, turǵyndardy qyzyq ınteraktıvterge tartyp, barlyq is-sharany ekologıalandyrý mańyzdy", - dedi Evgenıı Muhamedjanov.
Aksıaǵa QR eńbek sińirgen mádenıet qaıratkeri, Qazaq radıosynyń ardageri Amanjan Ensebaıuly da keldi. Ol Almatyny abattandyrý — árbir qala turǵynynyń paryzy ekenin atap ótti.
"Taza Qazaqstan" respýblıkalyq baǵdarlamasy - Almatyny odan ári jaıly, tartymdy etýge baǵyttalǵan naqty qadam. Bul bastama tabıǵatqa jáne qorshaǵan ortaǵa degen qurmettiń kórinisi. Ata-babalarymyz "Shópti taptama, julma" degen. Bul mura ekologıalyq mádenıetti qalyptastyrýda erekshe ról atqarady. Ásirese jastarǵa sulýlyqqa, tazalyqqa, mádenıetke durys kózqaras darytý mańyzdy. Mundaı senbilikterdi men tárbıe mektebi dep baǵalaımyn", - dedi Amanjan Ensebaıuly.
Aıta keteıik, qalalyq senbiliktiń qorytyndysy boıynsha shamamen 1 myń aǵash jáne 3 myń buta otyrǵyzyldy. 8 myń tonna qoqys jınalyp, shyǵaryldy. Barlyǵy 13 myńnan astam adam qatysyp, 350 tehnıka birligi jumyldyryldy.