Almaty ákimi Darhan Satybaldy jumys sapary aıasynda Bostandyq aýdanyndaǵy birqatar tabıǵı jáne qoǵamdyq keńistikti aralap kórdi. Jumys saparyna Esentaı ózeniniń jaǵalaýy, Bas botanıkalyq baq jáne «Ońtústik» saıabaǵy kirdi.
Jumys sapary Esentaı ózeniniń arnasyn tekserýden bastaldy. Qala basshysy keıbir aýmaqtarda tósem sapasyna jáne jaǵalaýdy nyǵaıtý jumystaryna nazar aýdaryp, merdiger uıymdarǵa uzaq merzimge shydaıtyn ári qaýipsiz materıaldardy qoldanýdy tapsyrdy.
«Munda barlyǵy sapaǵa baılanysty. Bul jolmen kún saıyn balalar júredi. Sondyqtan jabyn shógip ne buzylyp ketpes úshin berik bolýy kerek», – dedi Darhan Satybaldy.
Ákim sózinde jaǵalaýdy abattandyrý jumystary estetıka men yńǵaılylyqty ushtastyrýǵa tıis ekenin, al jaǵalaýdy bekitý sharalary uzaqmerzimdi turaqtylyqty eskere otyryp oryndalýy qajet ekenin atap ótti. Esentaı boıynda serýendeý baǵyttary, sport jáne balalar alańdary, sondaı-aq turǵyndarǵa arnalǵan demalys aımaqtary qurylady.
Budan keıin Darhan Satybaldy Almatydaǵy eń mańyzdy tabıǵı nysandardyń biri – Bas botanıkalyq baqtyń jaǵdaıymen tanysty. Aýmaǵy 100 gektardan asatyn baqta myńdaǵan ósimdiktiń túri ósedi, onyń ishinde sırek kezdesetin jáne endemıkalyq túrler bar. Tekserý barysynda Botanıka ınstıtýtynyń mamandary qalalyq ortaǵa beıim ósimdikter týraly baıandady. Ákimniń aıtýynsha, bul tájirıbe Almatyny kógaldandyrýdyń aldaǵy kezeńderinde eskeriledi.
Darhan Satybaldynyń aıtýynsha, Botanıkalyq baq qala turǵyndary úshin ashyq ári jaıly keńistik bolyp qala berýge tıis, sonymen qatar óziniń ǵylymı jáne tabıǵatty qorǵaý mısıasyn saqtaý mańyzdy.
Sapardyń sońǵy núktesi – «Ońtústik» saıabaǵy. Munda jasyl aımaqtardy jańartý jáne abattandyrý jumystary júrip jatyr. Ákim qurylys barysyn qarap, qoǵamdyq keńistikterdi qalyptastyrý kezinde keshendi tásildi ustanýdyń mańyzdylyǵyn atap ótti. Ol erekshe nazardy kógaldandyrýǵa jáne aýmaqtyń jalpy kórinisine aýdardy.
«Qoǵamdyq keńistik jasaıtyn bolsaq, ol barlyq turǵynǵa – eresekter men balalarǵa yńǵaıly bolýy kerek. Bul árkim ózin jaıly sezinetin tartymdy oryndar bolýǵa tıis», – dedi Darhan Satybaldy.
«Ońtústik» saıabaǵyn abattandyrý jobasynda jańa júrginshiler aımaqtaryn, jaryqtandyrý men oryndyq ornatý, balalar jáne sport alańyn salý, sondaı-aq aǵash pen buta otyrǵyzý qarastyrylǵan.
Qala ákimi atap ótkendeı, jasyl aımaqtardy damytý jáne qoǵamdyq keńistikterdi abattandyrý – ákimdiktiń jumysynyń negizgi baǵyttarynyń biri. Almatyda jaıly qalalyq ortany qalyptastyrýǵa jáne turǵyndardyń ómir sapasyn arttyrýǵa baǵyttalǵan jobalar júıeli túrde júzege asyrylyp keledi.