Esenalıev Talǵat Qamqabaıuly atalǵan mádenı nysannyń dırektory qyzmetine taǵaıyndaldy
Almatyǵa jasaǵan is-sapary barysynda QR Mádenıet jáne sport mınıstri Dáýren Abaev Ǵ. Músirepov atyndaǵy Qazaq memlekettik akademıalyq balalar men jasóspirimder teatryna jańa dırektor taǵaıyndady, dep habarlaıdy Almaty-akshamy.kz.
Jańa taǵaıyndaý týraly Mádenıet jáne sport mınıstri Facebook paraqshasynda jazdy.
«Almaty qalasyna jasaǵan is-sapar barysynda Ǵ. Músirepov atyndaǵy Qazaq memlekettik akademıalyq balalar men jasóspirimder teatryna bardym. Teatrdyń jumysymen tanysyp, Esenalıev Talǵat Qamqabaıulyn atalǵan mádenı nysannyń dırektory qyzmetine taǵaıyndadym»,- dep jazdy Dáýren Abaev.
Sondaı-aq Mádenıet jáne sport mınıstri buǵan deıin teatrdyń damýyna aıtarlyqtaı eńbek sińirgen úshin Surapbaev Azamat Satybaldyulyna alǵys bildirip, jańa dırektor Talǵat Qamqabaıulyna jaýapty qyzmette sáttilik tiledi.
QR Mádenıet jáne sport mınıstrligi taratqan málimetke sáıkes,Talǵat Qamqabaıuly Esenalıev 1977 jyly dúnıege kelgen. J.Elebekov atyndaǵy Respýblıkalyq estrada – sırk kolejin «Akter jáne kórkemsóz oqý sheberi» mamandyǵy boıynsha bitirgen. Orta – AzıalyqÝnıversıtetin «Qazaq tili men ádebıet pániniń oqytýshysy» mamandyǵy boıynsha, FGOÝDPO «RATI ishindegi Sahna óneri qaıratkerleriniń joǵary mektebin» (Reseı, Máskeý q.) «Sahna óneriniń sheberi» mamandyǵy boıynsha, Almaty úzdiksiz bilim berý ýnıversıtetin «Memlekettik jáne jergilikti basqarý» mamandyǵy boıynsha támamdaǵan. T.Júrgenov atyndaǵy Qazaq ulttyq óner akademıasyn «Rejıssýra» mamandyǵy boıynsha bitirgen. Ónertaný ǵylymdarynyń magıstri.
Eńbek jolyn 1997-2003 jyldary – M.Áýezov atyndaǵy Qazaq memlekettik akademıalyq drama teatrynyń bas admınıstratory bolyp bastaǵan.
2003-2015 jyldary – M.Áýezov atyndaǵy Qazaq memlekettik akademıalyq drama teatr dırektorynyń birinshi orynbasary;
2015-2016 jyldary – Ǵ.Músirepov atyndaǵy Qazaq memlekettik akademıalyq balalar men jasóspirimder teatry dırektorynyń birinshi orynbasary;
2016 jyldan MKQK «Memlekettik qýyrshaq teatrynyń» dırektory qyzmetin atqarǵan.