Almatylyqtar jalpy somasy 735 mln teńge salyq tólemegen. Bul týraly Óńirlik komýnıkasıalar qyzmetiniń brıfıńinde Almaty qalasy boıynsha Memlekettik kirister departamentiniń óndiristik emes tólemder basqarmasynyń basshysy Qýanysh Túmenbaev málimdedi, dep habarlaıdy Almaty-akshamy.kz.
Spıker 1 qazanda turǵyn úılerdiń, páterlerdiń, saıajaı qurylystarynyń jáne ózge de qurylystardyń ıelerine múlik salyǵyn tóleý qajettigin eske saldy.
«Eger salyq kezeńinde salyq salý obektisi menshik quqyǵynda on eki aıdan az bolsa, mundaı obektiler boıynsha tólenýge jatatyn múlikke salynatyn salyq salyq somasyn on ekige bólý jáne salyq salý obektisiniń menshik quqyǵynda bolǵan naqty kezeńdegi aılar sanyna kóbeıtý jolymen esepteletinin atap ótken jón. Birneshe jeke tulǵalardyń ortaq úlestik menshigindegi salyq salý obektisi úshin salyq olardyń osy múliktegi úlesine proporsıonaldy túrde esepteledi», - dedi Q.Túmenbaev.
Múlik salyǵynan kimder bosatylady:
- Keńes Odaǵynyń Batyrlary, Sosıalısik eńbek erleri, «Halyq qaharmany», «Qazaqstannyń Eńbek Epi» ataqtaryna ıe bolǵan, úsh dárejeli Dańq ordenimen jáne «Otan» ordenimen marapattalǵan adamdar - respýblıkalyq búdjet týraly zańda belgilengen jáne tıisti qarjy jylynyń 1 qańtaryna qoldanysta bolǵan aılyq eseptik kórsetkishtiń 1000 eselengen mólsheri sheginde, barlyq salyq salý obektileriniń jalpy qunynan;
- Ekinshi dúnıejúzilik soǵysynyń ardagerleri, jeńildikteri boıynsha soǵys ardagerlerine teńestirilgen ardagerler jáne basqa memleketter aýmaǵyndaǵy jaýyngerlik áreketterdiń ardagerleri, Uly Otan soǵysy jyldarynda tyldaǵy qajyrly eńbegi men minsiz áskerı qyzmeti úshin burynǵy KSR Odaǵynyń ordenderimen jáne medaldarymen nagradtalǵan adamdar, sondaı-aq, 1941 jylǵy 22 maýsymnan 1945 jylǵy 9 mamyrǵa deıin keminde alty aı kóleminde jumys istegen (qyzmet etken) adamdar jáne Uly Otan soǵysy jyldaryndaǵy tyldaǵy qajyrly eńbegi men minsiz áskerı qyzmeti úshin burynǵy KSR Odaǵynyń ordenderimen jáne medaldarymen marapattalmaǵan, barlyq salyq salý obektileriniń jalpy qunynan respýblıkalyq búdjet týraly zańda belgilengen jáne tıisti qarjy jylynyń 1 qańtarynda qoldanysta bolatyn aılyq eseptik kórsetkishtiń 1500 eselengen mólsheri sheginde múgedekter;
-jetim balalar men ata-anasynyń qamqorlyǵynsyz qalǵan balalar 18 jasqa tolǵanǵa deıingi kezeńge;- «Batyr Ana» ataǵyna ıe bolǵan, «Altyn alqa» alqasymen marapattalǵan kóp balaly analar, jalǵyz turatyn zeınetkerler respýblıkalyq búdjet týraly zańda belgilengen jáne tıisti qarjy jylynyń 1 qańtarynda qoldanysta bolatyn aılyq eseptik kórsetkishtiń 1000 eselengen mólsheri sheginde salyq salýdyń barlyq obektileriniń jalpy qunynan.
Jeke tulǵalardyń ishinde múlkine salyǵyn tólemeıtinderdiń tolyq tizbesi Salyq kodeksiniń 526-babynda kózdelgen. Bul rette salyq organdarynda jeńildikti jyl saıyn rastaýdyń qajeti joq.
«Búgingi tańda Almaty qalasy boıynsha jeke tulǵalardyń múlkine salyq salýǵa jatatyn obektilerdiń (jeke úıler, páterler, saıajaılar men garajdar) sany 642 172 quraıdy, baǵalaý quny 3 054 mlrd teńge, 2022 jyly eseptelgen salyq somasy 3,9 mlrd teńgeden asady. Ótken jylmen salystyrǵanda salyq salý obektileriniń sany baǵalaý quny 6 mlrd teńgemen 27 238-ge ulǵaıdy, onyń ishinde jeke úılerdiń sany 547 – ge, páterler – 21 262, garajdar-5 246-ǵa kóbeıdi. Aıta ketý kerek, jańa salyq salý nysandarynyń negizgi bóligi (9 167) Bostandyq aýdanyna tıesili», - dedi spıker.
Spıkerdiń málimetinshe, búgingi tańda Almaty qalasynyń 55 644 turǵynynyń múlik salyǵy boıynsha 735 mln teńge qaryzy bar. Tólenbegen salyqtyń negizgi somasy Medeý aýdanynyń turǵyndaryna tıesili, olardyń somasy 315 mln teńgeni quraıdy, al tólemegender sany jóninen antıreıtıngti Bostandyq aýdanynyń turǵyndary bastap tur - 37 myń adam.
Departament turǵyndardy qaryzdaryn óteýge shaqyrady jáne salyqtardy ýaqtyly tóleýge keńes beredi.
Suraqtar týyndaǵan jaǵdaıda turǵyndar 1414 nómiri boıynsha biryńǵaı baılanys ortalyǵyna júgine alady.