Qaznette osyndaı qorqynyshty vıdeo tarap júr.
Onda móldir taspalardyń kúrishke uqsas nárse shyǵaratyn jabdyq kórsetilgen. Polıetılen paketterden kúrish pen makaron ónimderi osylaı jasalady eken, al olardy qoldaný densaýlyqqa zıan.
Bul aqparat shyndyqqa janaspaıdy, dep habarlaıdy Almaty-akshamy.kz Stopfake.kz-ke silteme jasap.
Rolıktiń joǵarǵy sol jaq buryshynda SunPring dep jazylǵan logotıp kórinip tur. Osy sóz boıynsha izdegende Jeliden osylaı atalatyn qytaılyq kompanıa shyǵady. Ol tamaq pen jemge arnalǵan ekstrýderlerdi óndirýmen jáne satýmen aınalysady. Ekstrýderler – bul shıkizattan tolyq daıyn ónim shyǵaratyn mashınalar. SunPring jelisinde snekter, balalar sút qospasyn, balyq, mysyq jáne ıt taǵamdaryn shyǵarýǵa arnalǵan ekstrýderler bar.
Sondaı-aq, kompanıa jasandy kúrish shyǵaratyn ekstrýderler satady. Jabdyqtyń osy túrine arnalǵan paraqshada jarmany qandaı shıkizattan óndirýge bolatyndyǵy egjeı-tegjeıli sıpattalǵan. Árıne, polıetılen paketterden emes. Jasandy uzyn dándi kúrish jasaý úshin kúrish, júgeri, tary, bıdaı, suly, soıa jáne túrli dárýmenderdi qoldaný usynylady. Sonymen qatar, kompanıanyń saıtynda mundaı kúrishtiń quny tabıǵı jarmanyń qunynan joǵary ekendigi kórsetilgen. Kompanıa ókilderi atap ótkendeı, jasandy analog áldeqaıda nárli bolyp tabylady.
Demek, Qaznette taralǵan kadrlarda jasandy kúrish jasaý prosesi kórsetilgen, biraq ol polıetılen paketterden emes, usaqtalǵan kúrishten, júgeriden, tary, suly jáne basqa da dándi daqyldardan jasalady. Mundaı kúrishtiń quny tabıǵı kúrishtiń qunynan joǵary bolǵandyqtan, biri dep ekinshisin usyný maǵynasyz.