Qazaqstan jaıynda reseılik bloger 4 myńnan astam reportaj ben fılm túsirgen.
Búgin Prezıdent «Ádiletti Qazaqstan: birlik, turaqtylyq, damý» atty HHHİİ sesıasynyń otyrysynda birqatar azamattarǵa alǵys bildirdi. Solardyń biri - «Alǵa, Peterbýrg» ıýtýb jobasynyń avtory Ivan Chervınskıı, dep habarlaıdy Almaty-akshamy.kz Egemen.kz-ke silteme jasap.
Qanshama kórermen nazaryn ózine aýdarǵan «Alǵa, Pererbýrg» ıýtýb arnasy Dımash Qudaıbergen jaıly, sondaı-aq qazaq mádenıeti men Qazaqstannyń jetistikke jetken azamattary týraly derek usynady.
Joba avtorynyń aıtýynsha, bunyń barlyǵy Dımash Qudaıbergendi tanyǵannan keıin bastalǵan.
«Dımashty I’m a singer jobasynda kórdim. Qytaı azamattary onyń óneri men talantyna tamsanyp jatty. Sodan keıin onyń vıdeolary tanymal bola bastady. Dımash týraly túsirgen vıdeolarym kóp qaralym jınady. Men kópshiliktiń Dımash týraly bilgenin qaladym. Nátıjesinde 500 mıllıon adam kórdi», - deıdi Ivan Chervınskıı.
Búgin joba avtory Qasym-Jomart Toqaevtyń tóraǵalyǵymen Qazaqstan halqy Assambleıasynyń «Ádiletti Qazaqstan: birlik, turaqtylyq, damý» atty HHHİİ sesıasynyń otyrysynda prezıdent alǵysynyń ıegeri atanyp, sóz sóıledi.
«Men Qazaqstandy 2017 jyly Dımash Qudaıbergen arqyly tanydym. Sodan beri men Qazaqstan jaıynda 4 myńnan astam reportaj ben fılm túsirdim. Ózim de qazaq mádenıeti men qazaqy rýhty ábden sezindim. «Men qazaqpyn» dep aıtsam da bolady. Bul el maǵan myńdaǵan dos taýyp berdi. Barlyǵy kómegin aıamaıdy. Sol úshin de alǵys bildiremin. Meniń qazaq mádenıeti men sportyna shyn júrekten arnaǵan týyndylarymdy joǵary baǵalap jatqan barsha qazaq halqyna zor alǵys aıtamyn.
Qurmetti Prezıdent, búginde Qazaqstan túrli salada jetistikterge jetip jatqanyna óte qýanyshtymyn, ásirese, jastardyń jetistigine erekshe qýanamyn. Qazaqstan áli talaı belesti baǵyndyratynyna senimdimin. Basqa memleketterdiń de Qazaqstannan úıreneri kóp dep oılaımyn. Máselen qonaqjaılylyǵy, toleranttylyǵy men mádenı jan-jaqtylyǵy - kópke úlgi. Men Qazaqstan týraly álem elderiniń bilgenin qalaımyn. Men Qazaqstandy jaqsy kóremin!», dedi ol.