Qazaqstan Respýblıkasynyń Memlekettik hatshysy Erlan Qarın Eýropa Odaǵyna múshe memleketterdiń elimizde akkredıttelgen dıplomatıalyq ókildikteriniń basshylarymen kezdesti, dep habarlaıdy Almaty-akshamy.kz Aqordanyń baspasóz qyzmetine silteme jasap.
Memlekettik hatshy dıplomattarǵa Qasym-Jomart Toqaevtyń saıası reformalarynyń mán-mańyzy týraly aıtyp, Prezıdenttiń jaqynda Qazaqstan halqyna arnaǵan «Jańa Qazaqstan: jańarý men jańǵyrý joly» atty Joldaýynyń negizgi qaǵıdalaryna toqtaldy.
Elimizdiń sýperprezıdenttik júıeden myqty Parlamenti bar prezıdenttik respýblıkaǵa kóshý tetikterine, sonyń ishinde, Májilisti qalyptastyrýdyń proporsıonaldy-majorıtarlyq júıesine, palatalardyń ókilettikterin keńeıtý, saıası partıalardy tirkeý tártibin yryqtandyrý, jergilikti ózin-ózi basqarý ınstıtýttaryn jetildirý, memlekettiń ákimshilik-aýmaqtyq qurylymyn reformalaý, zań ústemdigi qaǵıdattaryn nyǵaıtý máselelerine erekshe kóńil bólindi.
Erlan Qarın sheteldik dıplomattardyń jańa reformalarǵa qatysty birqatar suraǵyna jaýap berdi.
Kezdesýge qatysýshylar Qazaqstan men Eýropa Odaǵy arasyndaǵy seriktestiktiń ortaq baǵyttaryn talqylady, sondaı-aq, aımaqtaǵy keń aýqymdy máseleler jóninde pikir almasty.