Astana qalasy ákimdigine qarasty «Astana Tazalyq» JSHS jalǵan kólik jóndeý jumystary úshin dep mıllıondap aqsha aýdarǵan. Al shyn máninde ol jumystar oryndalmaǵan, tipti keı jumysty kompanıa óz qyzmetkerleriniń moınyna artyp qoıǵan, dep habarlaıdy almaty-akshamy.kz.
Bul týraly «Ádildik joly» RQB Astana qalasy fılıalynyń basshysy Darhan Quljambekov áleýmettik jelidegi paraqshasynda jazdy.
Qoǵamdyq uıymǵa bıyl aqpanda oryndalmaǵan qyzmet úshin «Astana Tazalyq» JSHS qarajat aýdarǵany jóninde derek jetken. Negizi qarajatty kólikti jóndeý qyzmeti úshin tóleý kerek bolǵan.
Sodan keıin Darhan Quljambekov elordanyń İshki memlekettik aýdıt departamentine habarlasqan. Sol habarlamaǵa saı departament kompanıanyń 2020 jyldyń basynan 2023 jyldyń sońyna deıingi aralyqtaǵy qyzmetine aýdıt júrgizedi.
Tekserý barysynda 2022 jáne 2023 jyldary kólikterdi jóndeýge jalǵan qarajat aýdarylǵany anyqtaldy. Bul JSHS sol aralyqta KamAZ markaly avtokólikterdi jóndeýge 468 559 myń teńgege memlekettik satyp alý sharttaryn jasasqan.
Tekserý barysynda 2022 jyly is júzinde 234 958 myń teńge ıgerilgeni anyqtalǵan. Alaıda qosalqy bólshekterdi aýystyrý boıynsha jumystar is júzinde oryndalmaǵan. Muny júrgizýshilerdiń túsindirmeleri men qujattary rastaıdy, - deıdi Darhan Quljambekov.
Sonymen qatar 2022 jyly jumystar naqty oryndalmastan 2,8 mln teńge taǵy tólengen.
Al 2023 jyly keıbir kólik «Aqmola KAMAZ avtoortalyǵy» JSHS-da jóndeýden ótpegen, ol jumystardy seriktestik óz kúshimen istegen. Sol jyly jóndeý jumystary naqty oryndalmastan, 7,6 mln teńge kóleminde qarajat aýdarylǵan.
Qoǵamdyq uıym endi departament nusqamasyn JSHS-nyń oryndaýyn qadaǵalaýǵa alǵaly jatyr. Al anyqtalǵan quqyqbuzýshylyqtar úshin JSHS bas ınjeneri tártiptik jaýapkershilikke tartylǵan.
Aıta keteıik, «Astana Tazalyq» JSHS-nyń jalǵyz quryltaıshysy – Astana qalasy otyn-energetıkalyq kesheni jáne komýnaldyq sharýashylyq basqarmasy. Kompanıanyń jarǵylyq kapıtalyndaǵy basqarma úlesi – 100%.