Prezıdent Qasym-Jomart Toqaev 8-13 qyrkúıek aralyǵynda ótetin V Dúnıejúzilik kóshpendiler oıyndarynyń daıyndyq barysymen tanysty, dep habarlaıdy aqshamnews.kz.
Memleket basshysy, eń aldymen, «Astana arena» stadıonyn aralap kórdi. Munda halyqaralyq sporttyq-mádenı is-sharanyń ashylý saltanaty ótedi. Otyz myń kórermen erkin syıatyn stadıonǵa jyl boıy kúrdeli jóndeý júrgizildi. Qazirgi kezde abattandyrý jumystary aıaqtalyp, jabdyqtary tolyqtaı jańartyldy.
Qasym-Jomart Toqaevqa «Qazaqstan» jeńil atletıka kesheninde ornalasqan Akredıtteý ortalyǵynyń jumysy, Kóshpendiler oıynyna qatysatyn ulttyq quramanyń kıim úlgisi tanystyryldy. Halyqaralyq is-sharaǵa 1500 erikti tartylady
Týrızm jáne sport mınıstri Ermek Marjyqpaev Ulttyq quramanyń ázirligi jóninde baıandady.
Onyń aıtýynsha, osy ýaqytqa deıin halyqaralyq jáne respýblıkalyq deńgeıde 42 oqý-jattyǵý jıyny ótken. Sondaı-aq sportshylar 7 halyqaralyq jáne 25 respýblıkalyq týrnırge qatysqan.
Jalpy V Dúnıejúzilik kóshpendiler oıyndaryna álemniń 89 elinen 2800 qatysýshy men resmı delegasıa músheleri keledi. Saıystyń 21 túrinen 97 medal sarapqa salynady. Negizgi jarystar «Astana-arena» stadıony, «Qazanat» ıpodromy, «Alaý» muz saraıy, Jaqsylyq Úshkempirov atyndaǵy Jekpe-jek saraıy, «Dýman» qonaq úı-sport kesheninde ótedi. Al jamby atý men teńge ilýge arnaıy alań jasaqtalǵan.
Halyqaralyq doda aıasynda 150-den astam mádenı is-shara josparlanǵan. Máselen, Etnoaýylda Kóshpendiler mádenıeti mýzeıi, qolónershiler jáne músinder kórmesi, al Ulttyq mýzeıde «Kóshpendi halyq: tarıh, tanym, taǵylym» atty halyqaralyq ǵylymı-praktıkalyq konferensıa uıymdastyrylady.
Aldyn ala boljamǵa sáıkes, osy kúnderi elordaǵa 100 myńǵa jýyq týrıs kelýi múmkin. Osyǵan oraı 20-dan astam qonaq úıdiń, sondaı-aq týrıser jıi baratyn oryndardyń daıyndyǵy pysyqtalyp, qala kóshelerin abattandyrý, bezendirý jumystary qarqyndy júrgizilip jatyr.
Memleket basshysy at sportynan jarystar ótetin «Qazanat» ıpodromyn, jamby atý jáne teńge ilý saıystary úshin arnaıy jasaqtalǵan alańdy kórdi