Oń jaqty róldi avtokólikterge jolaýshy tasymaldaýǵa tyıym salynatyn boldy
Qazaqstan Respýblıkasynyń Kólik mınıstri Marat Qarabaev 1 qańtardan bastap taksı salasyna engiziletin jańa ózgerister týraly málimdedi, dep habarlaıdy aqshamnews.kz
Mınıstrdiń aıtýynsha, taksı qyzmetin kórsetetin kompanıalarmen jasalǵan memorandýmǵa sáıkes, oń jaqty róldi avtokólikterdi paıdalanatyn júrgizýshilerdi jolaýshy tasymaldaý qyzmetterinen shettetiledi.
«Oń jaqty róldi avtokólikterdi taksı qyzmetinde paıdalaný zańǵa qaıshy, sondyqtan InDrive jáne Yandex sekildi kompanıalar óz júıelerinde mundaı kólikterdi tirkemeıdi. 1 qańtarǵa deıin Yandex jáne InDrive óz platformalarynda ınventarızasıa júrgizip, oń jaqty róldi kólikterdi anyqtap, olardyń qyzmetin shekteıtin bolady», – dedi Marat Qarabaev úkimettegi baspasóz konferensıasynda.
Mınıstrdiń aıtýynsha, buryn oń jaqty róldi bolyp, keıin sol jaqty rólge qaıta jasalǵan kólikter de qaýipsiz emes, sondyqtan olar da qyzmetterden shettetiledi.
«Agregatorlar mundaı kólikterdi de anyqtap, 1 qańtardan bastap olardy qyzmetterinen shettetedi», – dep tolyqtyrdy mınıstr.
Sondaı-aq, mınıstrlik jol qozǵalysy erejelerin únemi buzatyn júrgizýshilerdiń tizimin agregatorlarǵa beretin bolady, bul júrgizýshiler de júıeden ajyratylady.
Al, seriktermen birge júrgen júrgizýshiler úshin qalaaralyq qashyqtyqty 50 km-ge deıin shekteý týraly usynys tek jumys tobyndaǵy bir múshe tarapynan jasalǵan usynys ekenin mınıstr atap ótti.
«Bul túzetý talqylanyp jatqan joq jáne talqylanbaıdy da. Qazirgi talqylaý kezeńinde mundaı shekteýler qarastyrylmaǵan. Qashyqtyqqa qatysty naqty bir shekteý engizý josparlanbaǵan, jáne bul másele boıynsha qoǵamdyq tyńdaýlar ótkizý de qarastyrylmaǵan. Aıta keterligi, eki apta buryn Indrive kompanıasynyń quryltaıshysymen kezdesý ótti, jáne meniń oıymsha, kompanıa basshylyǵynyń eń basty maqsaty — qozǵalys qaýipsizdigin qamtamasyz etý», – dedi Marat Qarabaev.