Qasym-Jomart Toqaevtyń jumys sapary Sergeevka sý qoımasyn, Qyzyljar aýdanyn jáne Petropavl qalasynyń tóńiregin tikushaqpen aralap kórýden bastaldy, dep habarlaıdy almaty-akshamy.kz.
Oblys ákimi Ǵaýez Nurmuhambetov Memleket basshysyna Soltústik Qazaqstan oblysynyń Qyzyljar, Esil, Shal aqyn aýdandary men Petropavl qalasyndaǵy sý tasqyny jaǵdaıyn baıandady. Óńir ákiminiń aıtýynsha, alty aýdanda tótenshe jaǵdaı jarıalanǵan. Qazirgi tańda 2 myńnan astam turǵyn úıdi sý basqan, 10345 adam evakýasıalanǵan.
Sý tasqynyna qarsy sharalarǵa 5270 adam jáne 906 tehnıka jumyldyrylǵan. Halyqtyń turmys-tirshiligine qajetti ınfraqurylymdardy qalpyna keltirý jumystary júrgizilip jatyr. Tabıǵı apattan zardap shekken azamattardyń materıaldyq shyǵyndaryn esepteý jáne óteý jóninde komısıa qurylǵan.