Memleket basshysy Qasym-Jomart Toqaev «Qazposhta» AQ basqarma tóraǵasy Ásel Janasovany qabyldady, dep habarlaıdy almaty-akshamy.kz.
Prezıdentke «Qazposhta» aksıonerlik qoǵamynyń byltyr atqarǵan qyzmetiniń nátıjesi jáne kompanıanyń qazirgi qarjylyq jaǵdaıy jóninde málimet berildi. Ásel Janasovanyń aıtýynsha, kompanıa sońǵy 5 jylda alǵash ret 2,4 mıllıard teńge kóleminde paıda taýyp, aksıonerge 1,5 mıllıard teńge dıvıdend tólegen. Salyq aýdarymdary men baj alymdarynyń jalpy kólemi 32,7 mıllıard teńgeni qurady.
Qasym-Jomart Toqaevqa byltyr «Qazposhta» arqyly jetkiziletin sálemdemelerdiń sany 35 paıyzǵa kóbeıip, olardy el aýmaǵynda jetkizý jyldamdaǵy eki ese artqany týraly baıandaldy.
Memleket basshysyna «Qazposhta» aksıonerlik qoǵamy men YTO Express Group kompanıasy arasynda seriktestik qatynas ornaǵany jaıynda aıtyldy.
«Qazposhta» Almatyda aýdany shamamen 40 myń sharshy metr bolatyn «A» sanatyndaǵy joǵary tehnologıalyq qoıma salýǵa nıetti. Nysan Eýrazıa keńistiginde negizgi tranzıt torabyna aınalýǵa tıis ári Qytaıdan EýroOdaq, Eýrazıalyq ekonomıkalyq odaq jáne Ortalyq Azıa baǵyttary boıynsha Qazaqstannyń júk ótkizý áleýetin arttyrýǵa yqpal etedi.
Sonymen qatar Prezıdentke otandyq kompanıanyń el aýmaǵyndaǵy ınfraqurylymy men bólimsheler jelisiniń qazirgi jaı-kúıi tanystyryldy.
Kezdesý sońynda Qasym-Jomart Toqaev «Qazposhta» aksıonerlik qoǵamynyń qarjylyq jaǵdaıyn jaqsartý jáne logıstıkalyq áleýetin arttyrý jumystaryn jalǵastyrýdy tapsyrdy.