Qytaıdyń Shyńjań medısınalyq ýnıversıtetiniń 6-aýrýhanasy men Szılın ýnıversıtetiniń 2-aýrýhanasynyń ortoped-travmatolog-dárigerleriniń delegasıasy tájirıbe almasý maqsatynda Almaty №4 qalalyq klınıkalyq aýrýhanasynda boldy, dep habarlaıdy almaty-akshamy.kz.
Eki el arasynda densaýlyq saqtaý salasyndaǵy yntymaqtastyqty tereńdetý maqsatynda ortopedıa salasynda 10 mamannan turatyn Qytaı delegasıasy akademıalyq almasý formatynda paneldik sesıalar ótkizdi. Ǵylymı taldaý Almaty №4 qalalyq klınıkalyq aýrýhanasy bazasynda ótti.
«470 tósek-orynǵa eseptelgen aýrýhana Travmatologıa jáne ortopedıa aımaqtyq ortalyǵyn damytýǵa bet burdy. Ortalyq quramyna travmatologıalyq kómektiń tolyq sıkli boıynsha 11 mamandandyrylǵan qurylymdyq bólimshe kiredi. Jasandy ıntellektiń medısınaǵa engizilýi úlken býyndy aýystyrýda robot kómegimen jasalatyn otany jasaý arqyly úlken serpilis boldy. №4 qalalyq klınıkalyq aýrýhana bul tájirıbeni Qazaqstanda birinshi bolyp qoldandy», - dep atap ótti óz sózinde №4 qalalyq klınıkalyq aýrýhananyń dırektory Birjan Dosmaıylov.
Otandyq travmatologıa úshin súıek aqaýyn qalpyna keltirý úshin 3D formatynda basyp shyǵarylǵan tıtan qorytpasynan jasalǵan ımplantty zertteý jáne klınıkalyq qoldaný ózekti bolyp tabylady. Bul Almaty men Qytaı travmatologtary arasyndaǵy akademıalyq yntymaqtastyqty damytýdaǵy negizgi máseleniń birine aınaldy.
№4 qalalyq klınıkalyq aýrýhananyń anestezıologıa, reanımasıa jáne qarqyndy terapıa bólimshesiniń bazasynda egde jastaǵy naýqastarda jambas súıegin aýystyrý kezinde anestezıany basqarý strategıasy qarastyryldy.
Dıabettik jaralardy emdeý, sondaı-aq ahıl sińiriniń jiti úzilýin hırýrgıalyq emes fızıoterapıa jáne teri arqyly tigis ádisimen emdeý tájirıbesi eki tarap úshin de qyzyqty boldy. №4 qalalyq klınıkalyq aýrýhanada bul patologıamen aýyratyn naýqastar kúrdeli jaraqat jáne súıek-irińdi hırýrgıa bólimshelerinde emdeledi.
№4 qalalyq klınıkalyq aýrýhananyń omyrtqa neırohırýrgıasy boıynsha úlken tájirıbesi bar. Birjaqty bıportaldy endoskopıalyq omyrtqa hırýrgıasy (UBE) ádisin klınıkalyq qoldaný máseleleri qytaılyq áriptesterdiń tájirıbesin mysalǵa ala otyryp qarastyrylady.
Almatylyq dárigerlerdiń týa bitken jambas býynynyń dısplazıasyn hırýrgıalyq emdeý salasynda tájirıbemen bólisýge turarlyq eńbegi bar. №4 qalalyq klınıkalyq aýrýhananyń endoprotezdeý jáne ortopedıalyq hırýrgıa bólimsheleriniń dárigerleri mundaı otalardy sátti jasap jatady.
Qytaıdan kelgen dárigerlerdiń sapary travmatologıadaǵy medısınalyq qyzmettiń sapasyn arttyrý, tájirıbe almasý jáne medısına qyzmetkerleriniń biliktiligin arttyrý maqsatynda uıymdastyryldy. Almaty men Qytaıdaǵy klınıkalardyń basshylyǵy akademıalyq jáne praktıkalyq tájirıbe almasý maqsatynda uzaq merzimdi turaqty qarym-qatynas ornatýǵa kelisti.