«Azamattarǵa arnalǵan úkimet» 2024 jyldyń tórt aıynda 59 mlrd teńge mólsherinde 1,7 mln tólem óńdedi. Bul soma bıyl alǵash ret engizilgen jańa tólemniń – jumys berýshiniń mindetti zeınetaqy jarnasynyń somasy.
Jumys berýshiniń mindetti zeınetaqy jarnalary 1975 jyldyń 1 qańtarynan keıin týylǵan ár qyzmetker úshin tabysynyń 1,5% mólsherinde tólenedi. Jarna aldymen «Azamattarǵa arnalǵan úkimettiń» shotyna túsedi. Memlekettik korporasıa Áleýmettik Kodekstiń 17-babyna sáıkes ár salymshynyń barlyq zeınetaqy jarnalarynyń esebin júrgizedi. Sodan keıin JBMZJ somasy úsh jumys kúnniń ishinde Biryńǵaı jınaqtaýshy zeınetaqy qoryndaǵy shartty zeınetaqy shottaryna aýdarylady.
JBMZJ-nyń on paıyzdyq zeınetaqy jarnalarynan (MZJ) aıyrmashylyǵy - bul soma qyzmetkerdiń menshigi bolyp eseptelmeıdi, kapıtaldandyrylmaıdy jáne mura retinde qaldyrylmaıdy.
Shartty jınaqtar - zeınetaqy júıesindegi qosymsha deńgeı. Zeınetaqynyń bir bóligin jumys berýshiniń mindetti zeınetaqy jarnalarynan alý úshin júıege qatysý ótili 5 jyldan kem bolmaý kerek. Bul rette jınaqtalǵan JBMZJ-nyń birjolǵy tólem somasy 2 eń tómengi kúnkóris deńgeıi mólsherinen aspaýy tıis.