Qasym-Jomart Toqaevtyń Qaraǵandy oblysyna jumys sapary Temirtaý qalasyndaǵy Qarmet metalýrgıalyq kombınatyn aralap kórýden bastaldy, dep habarlaıdy aqshamnews.kz.
Prezıdent №3 domna peshiniń jumysymen tanysty. Munda jylyna 3,8 mıllıon tonna shoıyn óndiriledi.
«Qarmet» aksıonerlik qoǵamy Dırektorlar keńesiniń tóraǵasy Andreı Lavrentev pen kásiporynnyń bas dırektory Vadım Basın óndiristi damytý úshin atqarylǵan jáne júzege asyrylyp jatqan jobalar jóninde baıandady. Bul maqsatqa 3,5 mıllıard dollardan astam qarjy qarastyrylǵan. Budan bólek 500 mıllıon dollar shamasynda Kómir departamentindegi jáne 978 mıllıon dollar kóleminde Temir rýdasy departamentindegi jobalarǵa qosymsha ınvestısıa quıý josparlanǵan.
Kásiporyn ǵımarattar men nysandarǵa aýqymdy jóndeý jumystaryn júrgizip jatyr. Bıylǵy jańǵyrtý baǵdarlamasyna 100-den astam nysan engen. 50 myń sharshy metr shatyr aýystyrylýda. Sonymen qatar buǵan deıin qabyldanǵan «Tazalyq» baǵdarlamasyna sáıkes 120 sanıtarıalyq-turmystyq ǵımaratqa kúrdeli jóndeý júrgizile bastady.
Memleket basshysyna sláb pen blúm shyǵaratyn №2 konvertorlyq seh pen metal ázirlemelerin úzdiksiz quıý mashınasynyń jumysy tanystyryldy. Kásiporyn basshylyǵy búginde mekemeniń tehnıkalyq jaǵdaıyn babynda ustap turý, jóndeý júıesin, sondaı-aq krıstaldandyrǵysh aınalym júıeleri men barlyq mashına segmentterin jetildirý basty mindet ekenin atap ótti. Kelesi jyly basqarý jáne gıdravlıka júıelerin jańǵyrtý jumystary atqarylmaq.