Memleket basshysy Ǵylym jáne joǵary bilim mınıstri Saıasat Nurbekti qabyldady, dep habarlaıdy almaty-akshamy.kz.
Saıasat Nurbek:
Joǵary bilim jáne ǵylym júıesin damytýǵa baǵyttalǵan birqatar bastama men jobalardy tanystyrdy;
elimizde osy ýaqytqa deıin sheteldik joǵary oqý oryndarynyń 25 fılıaly ashylǵanyn aıtty:
– sheteldik seriktestermen aımaqtardaǵy memlekettik ýnıversıtetterdi halyqaralyq bilim berý standarttary bar zertteý ýnıversıtetterine aınaldyrý týraly kelisimderge qol jetkizilgen;
– bıyl stýdentterge qarjylaı qoldaý kórsetýdiń jańa tetikteri engizile bastady. Olardyń qataryna «Keleshek» biryńǵaı erikti jınaqtaý júıesin, «Ulttyq qor – balalarǵa» baǵdarlamasyn, jeńildetilgen bilim berý nesıesi men dıfferensıalanǵan granttardy jatqyzýǵa bolady. Atalǵan sharalar halyqtyń barlyq sanatyna joǵary bilimniń qoljetimdi bolýyn qamtamasyz etýge baǵyttalǵan.
Jasandy ıntellektini damytý jónindegi Prezıdent tapsyrmalarynyń oryndalýy týraly esep berdi:
– qazir 8 joǵary oqý ornynda 15 bilim berý baǵdarlamasy boıynsha 2000-nan astam stýdent jasandy ıntellekt salasyn oqyp jatyr;
– sıfrlyq ekonomıkaǵa beıimdelgen kadrlardyń áleýetin damytý úshin Google, Nvidia, Coursera, 01 Edu System jáne Huawei sıaqty transulttyq kompanıalarmen yntymaqtastyq ornatylǵan;
– jasandy ıntellekt salasynda mamandar daıarlaý úshin «Bolashaq» baǵdarlamasy arqyly jyl saıyn 100 stıpendıa bólý josparlanyp otyr.
Kezdesý sońynda Memleket basshysy jataqhanalar salý, joǵary bilim men ǵylym ınfraqurylymyn odan ári damytý jóninde birqatar tapsyrma berdi.