VIII saılanǵan Almaty máslıhatynyń kezekten tys XXI sesıasy barysynda depýtattar qalanyń qoǵamdyq kóliginde jol júrýge qatysty 120 teńgege jańa tarıfti maquldady.
Búginde Almatyda 22 jeke jáne 1 komýnaldyq avtobýs parki jumys isteıdi. Kún saıyn jelide shamamen 2,3 myń avtobýs pen 184 troleıbýs júredi. Qoǵamdyq kóliktermen jol júretin jolaýshylar sany kúnine 1,5 mıllıon adamnan asty.
Máslıhat depýtattarynyń aldynda sóz sóılegen qalalyq mobıldilik basqarmasynyń basshysy Saǵyndyq Telibaev 2023 jylǵy tamyzda jol júrý tarıfi 11 jylda alǵash ret 100 teńgege deıin kóterilgenine qaramastan, jol aqysyn tóleýden túsetin kúndelikti túsimder avtobýstardy jóndeý, qosalqy bólshekter men shyǵyn materıaldaryn satyp alý sıaqty tasymaldaýshylardyń barlyq shyǵyndaryn ótemeıtinin atap ótti.
«Jyl saıyn avtobýstarǵa, qosalqy bólshekterge jáne ózge de shuǵyl shyǵystarǵa baǵanyń ósýi tirkelýde. Qosalqy bólshekterdi ýaqtyly satyp alý múmkin emes, al bul jolaýshylar tasymalynyń sapasyna teris áser etýde. Sonyń saldarynan qala turǵyndary ádil shaǵymdar jasaıdy. Ákimdik pen jeke tasymaldaýshylar jyljymaly quramdy únemi jańartyp otyrý jáne jumys istep turǵan avtoparkti sapaly kútip ustaý úshin orasan zor qarajat bólýge májbúr», - dedi Saǵyndyq Telibaev.
Ol Memleket basshysynyń qoǵamdyq kólikti ekologıalandyrý jónindegi tapsyrmalaryn oryndaý aıasynda Almaty ákimdigi 2023 jyly 600 jańa avtobýs pen 100 troleıbýs satyp alǵanyn, aǵymdaǵy jyly qosymsha 600 avtobýs, 112 troleıbýs jáne 100 elektrobýs satyp alý josparlanǵanyn atap ótti. Sonymen qatar, jeke tasymaldaýshylar 2023 jyly 550 avtobýs satyp aldy, Aǵymdaǵy jyly 400-ge jýyq jańa avtobýs pen 15 elektrobýs satyp alýdy josparlap otyr. Qabyldanǵan sharalar 2024 jyly ekologıalyq taza kóliktiń úlesin 70% - ǵa deıin arttyrýǵa múmkindik beredi, bul rette avtobýstardyń ortasha jasy 3 jyldy quraıdy.
«Búginde Almatyda 178 turaqty qalalyq jáne qala mańyndaǵy baǵyttar uıymdastyrylǵan, aǵymdaǵy jyly 70-ke jýyq eldi mekendi qamtı otyryp, qosymsha 20 jańa qala mańyndaǵy baǵyttar ashý josparlanýda. Tasymaldaýshylardyń naqty shyǵystary 310 teńgeden asady, keıbir baǵyttardy 400 teńgeden asady, osyǵan baılanysty ákimdik áleýmettik mańyzy bar baǵyttardy sýbsıdıalaýdy júrgizedi. Máselen, 2017-2023 jyldar aralyǵynda tasymaldaýshylarǵa 217,6 mlrd teńge sýbsıdıa tólendi. 2024 jyly sýbsıdıalardyń boljamdy somasy 97,3 mlrd. teńgeni quraıdy. Qabyldanǵan sharalar 2024 jyly sýbsıdıalar somasyn 7 mlrd teńgege deıin tómendetýge múmkindik beredi, sondaı - aq qala turǵyndaryn sapaly, qaýipsiz jáne jaıly qoǵamdyq kólik qyzmetterimen qamtamasyz etýge oń áser etedi», - dep qorytyndylady basqarma basshysy.
Atap óterlik jaıt, máslıhatpen kelisý rásiminen keıin tarıf qala ákimdiginiń qaýlysymen bekitiletinin atap ótý qajet. Merzimderi týraly qosymsha habarlanatyn bolady.