Almatydaǵy qalalyq mobıldilik basqarmasy qoǵamdyq kóliktegi qolma qol aqshasyz tólemniń túrlerin tizbektedi
VIII saılanǵan Almaty máslıhatynyń kezekten tys XXI sesıasy barysynda depýtattar qalanyń qoǵamdyq kóliginde jol júrýdiń 120 teńgelik jańa tarıfin maquldady.
Depýtattar aldynda sóılegen sózinde qalalyq mobıldilik basqarmasynyń basshysy Saǵyndyq Telibaev jańa tarıf engize otyryp, jol aqysyn qolma-qol aqshamen tóleýdi alyp tastaýdyń josparlanyp otyrǵanyn jetkizdi. Onyń aıtýynsha, bul shara tasymaldaý qaýipsizdigin qamtamasyz etýge baǵyttalǵan, sebebi avtobýs júrgizýshisi aqsha jınaýǵa alańdamaı kólik quralyn basqarady.
«Shynynda da, kóptegen adam qala qonaqtary men zeınetkerler qolma-qol aqsha tóleýge múmkindigi bolmaǵan kezde qıyndyqqa tap bolýy múmkin dep alańdaıdy. Biraq búginde jolaýshylardyń 97%-dan astamy jol aqysyn qolma-qol aqshasyz tóleıtinin, onyń ishinde zeınetkerlerdiń 90%-dan astam ekenin atap ótkim keledi. Zeınetkerlerdiń qalǵan bóligine qajet bolǵan jaǵdaıda kólik kartasyn alýǵa kómek kórsetiledi», - dedi basqarma basshysy.
Ol búginde qolma-qol aqshasyz esep aıyrysýdyń birneshe ádisi bar ekenin atady:
- «Ońaı» fılıaldarynda jáne klıentterge qyzmet kórsetýdiń 115 pýnktinde satyp alýǵa bolatyn kólik kartasy arqyly;
- SMS arqyly;
- mobıldi qosymsha arqyly (sheteldik qonaqtarǵa yńǵaıly bolý úshin ınterfeısti aǵylshyn tilinde engizý pysyqtalýda)
«Almaty qalasynyń Kólik holdıńimen birlesip, biz tólemniń yqtımal nusqalary týraly aqparattardy ornalastyrý boıynsha jumysty jalǵastyramyz. Olardyń barlyǵy turǵyndar úshin yńǵaıly jáne qala qonaqtaryna túsinikti», - dedi qalalyq mobıldilik basqarmasynyń basshysy.