QR Oqý-aǵartý mınıstri Ǵanı Beısembaev mektepke deıingi oqý men tárbıe salasyndaǵy tárbıeshilerdiń áleýmettik mártebesin kóterý sharalaryn baıandady.
Óz sózinde mınıstr eldegi 3,7 mln balanyń sapaly bilimi men sanaly tárbıesin jáne ómir qaýipsizdigin qamtamasyz etý mindetterin eske saldy, dep habarlaıdy Almaty-akshamy.kz QazAqparatqa silteme jasap.
«Birinshiden, mektepke deıingi oqý men tárbıe salasynda tárbıeshiniń áleýmettik mártebesin arttyrý, biliktilik pen kásibı damýdyń jańa formalaryn engizý arqyly kadrlyq áleýetti kúsheıtý; jalaqyny orta eseppen 30%-ǵa arttyrý; múmkindigi shekteýli balalarǵa ınklúzıvti ortada bilim alýǵa múmkindik berý maqsatynda «Pedagog kómekshisi» shtatyn engizý baǵytyndaǵy jumysty jalǵastyramyz», - dedi Ǵanı Beısembaev elordada ótken mınıstrliktiń alqa otyrysynda.
Sonymen birge, mınıstrdiń aıtýynsha, áleýmettik osal otbasylardan shyqqan mektep jasyna deıingi balalardy balabaqshada tegin tamaqpen qamtý qolǵa alynady.
Aıta keteıik, elordada KAZGÚÝ ýnıversıtetinde Oqý-aǵartý mınıstrliginiń 2022 jyly atqarylǵan jumys qorytyndylary jáne 2023 jylǵa josparlanǵan mindetter boıynsha keńeıtilgen alqa otyrysy ótýde.
Alqa otyrysyna QR Premer-Mınıstriniń orynbasary Altaı Kólginov, Oqý-aǵartý mınıstri Ǵanı Beısembaev, mınıstrlik ókilderi, pedagogter qatysyp otyr.