«Qurmetti senator» mártebesi Nursultan Nazarbaevqa 2019 jyldyń 30 mamyrynda berilgen.
Senat tóraǵasy Máýlen Áshimbaevtiń aıtýynsha, endi «Qurmetti senator» ataǵy eshkimge berilmeıdi, dep habarlaıdy Almaty-akshamy.kz
«Buǵan deıin «Qurmetti senator» ataǵy bir-aq adamǵa berilgen. Endi zańdarda «Qurmetti senator» degen ataq joq. Ony birden aıtaıyn. Senat reglamentine ózgeris engizildi. Osy reglamentte qarap, ony alyp tastadyq. Buǵan deıin ol bir-aq adamǵa berildi. Endi mundaı ataq eshkimge berilmeıdi. Óıtkeni qazir bizde ondaı quqyqtyq negiz joq, ony alyp tastadyq», - dedi Áshimbaev.
Onyń aıtýynsha, osydan úsh apta buryn Senat reglamentine tıisti ózgeris engizilgen.
«Osyǵan baılanysty biz «Qurmetti senator» ataǵyn reglamentten alyp tastadyq. Endi bizde ondaı ınstıtýt joq. 2022 jyly ótken referendýmda búkil halyq qoldap, Konstıtýsıadan Elbasyna qatysty normalar alynyp tastaldy. Erteń "Tuńǵysh Prezıdent – Elbasy týraly" zań kúshin (Parlament palatalarynyń birlesken otyrysynda) joıady», - dedi Senat tóraǵasy.