Densaýlyq saqtaý mınıstrligi kásibı mindetterin oryndaý barysynda medısına qyzmetkerlerine birneshe ret shabýyl jasaýyna baılanysty medısına mamandarynyń qyzmetine kedergi keltirip, olarǵa zorlyq-zombylyq kórsetkeni úshin qylmystyq jaýapkershilikke tartýdy engizýdi usyndy, dep habarlaıdy aqshamnews.kz.
2019 jyldan beri medısına mamandaryna 161 ret shabýyl jasaý faktileri tirkeldi. Al bıyl mamyr aıynda Almatyda jedel járdem feldsherine ony shaqyrǵan adamdar qol kóterip, páterinde qamaǵan. Qaraǵandyda qyzmettik mindetterin oryndaý barysynda jedel járdem qyzmetkerin aıaýsyz uryp-soqqan. Temirtaýda da jedel járdem kóliginiń júrgizýshisi taıaq jep, tonalǵan.
Dárigerlerdi qorǵaýdy kúsheıtý maqsatynda mınıstrlik medısına mamandarynyń kásibı qyzmetine kedergi keltirgeni jáne olarǵa qarsy qylmystyq áreketter boıynsha qylmystyq jaýapkershilikke tartýdy engizýge bastama kóterdi. Sol úshin 2024 jyldyń 12 sáýirinde densaýlyq saqtaý salasyndaǵy qyzmetkerlerdiń qaýipsizdigin qamtamasyz etý boıynsha Keshendi jospar bekitildi.
Bas prokýratýramen birlese Qylmystyq kodekske ózgerister ázirlendi, onda medısına mamandaryna qatysty zorlyq-zombylyq áreketteri úshin qylmystyq jaýapkershilik qarastyrylǵan. Qylmystyq kodekske "Medısına qyzmetkeriniń zańdy qyzmetine kedergi keltirý" jáne "Medısına qyzmetkerine qatysty zorlyq-zombylyq kórsetý" degen jańa baptar engizý usynylýda.
Bul qadamdar medısına qyzmetkerlerin qorǵaýǵa jáne qaýipsiz jumys ornyn qurýǵa baǵyttalǵan, dep atap ótti densaýlyq saqtaý mınıstrligi.