Jumys toby qurylýda.
Kaspıı teńizinde 50-deı ıtbalyqtyń denesi tabyldy, dep habarlady Almaty-akshamy.kz EGTRM Balyq sharýashylyǵy komıtetiniń baspasóz qyzmetine silteme jasap.
«2022 jyly 26 sáýirde áleýmettik jelilerdegi aqparatqa monıtorıń júrgizý barysynda Kaspıı teńiziniń jaǵalaýynda «Qarajanbas» ken ornynyń sý bógeti mańynda óli ıtbalyqtardyń 50-ge jýyq ushasy tabylǵany týraly aqparat anyqtaldy. Oqıǵa ornyna Jaıyq-Kaspıı oblysaralyq baseındik balyq sharýashylyǵy ınspeksıasynyń Mańǵystaý oblysy boıynsha balyq ınspeksıasy basqarmasynyń memlekettik ınspektorlary jedel joldandy»,- dep jazylǵan habarlamada.
Jaýapty memlekettik organdar arasynda 2021-2022 jyldarǵa arnalǵan ózara is-qımyl josparyna sáıkes, sý janýarlarynyń jappaı qyrylý jáne qaýip-qaterin anyqtaý úshin jumys toby qurylýda.
Osy maqsatta oblystyq quqyq qorǵaý, tabıǵat qorǵaý organdaryna, prokýratýra, veterınarıa, jergilikti atqarýshy organǵa, ekologıa jáne tótenshe jaǵdaılar departamentine jedel habarlandy.
«2022 jyly 26 sáýir saǵat 23:00-ge deıin kelip túsken aqparatqa sáıkes, teńiz jaǵalaýynyń árbir jerinde jatqan 22 óli ıtbalyq tabyldy. Itbalyqtardyń ólý sebepterin anyqtaý úshin janýarlardyń ushalaryn zerthanalyq tekserýge alý múmkindigin ınspeksıa qyzmetkerlerimen qarastyrylýda, óıtkeni olardyń deneleri ydyraý kúıinde. Qazirgi ýaqytta Mańǵystaý oblystyq Balyq ınspeksıasy basqarmasynyń ınspektorlary balyq sharýashylyǵy sýbektileriniń qoryqshylyq qyzmetimen birlesip, Kaspıı teńiziniń jaǵalaý aımaǵy men basqa da ýchaskelerge baqylaý jasaýda. Zerthanalyq zertteýler júrgizý úshin balyq qorǵaý ınspektorlary birneshe ıtbalyqty, teńiz sýy men topyraqtan synama aldy. Olar Ekologıa departamenti men veterınarlyq qyzmetine tapsyrylatyn bolady», - dep habarlady vedomstvo ókili.
2022 jylǵy 27 sáýirde atalǵan organdar qyzmetkerleri oqıǵa ornyna shyǵýdy josparlaýda.
Sonymen qatar, atalǵan fakti týraly QR BǴM Ǵylym komıtetiniń «Mıkrobıologıa jáne vırýsologıa ınstıtýty» zerthanasynyń qyzmetkerlerine, sondaı-aq «Gıdrobıologıa jáne ekologıa ınstıtýty» Batys Qazaqstan mekemesiniń qyzmetkerlerine habardar etildi.
Jaǵalaýdy baqylaý jumystary jalǵasýda. Jańartylǵan aqparat qosymsha jarıalanatyn bolady.