Bazalyq mólsherleme 14% deńgeıinde saqtalyp qaldy.
Qazaqstannyń Ulttyq bank tóraǵasy Ǵalymjan Pirmatov bazalyq mósherlemeniń nege ózgerissiz qalǵanyn túsindirdi, dep habarlaıdy Almaty-akshamy.kz.
«Bul sheshim osy jyldyń mamyr-maýsym aılarynda júrgizilgen boljamdyq raýndtyń qorytyndysy negizinde qabyldandy. Biz ınflásıa ósip, jyl sońyna qaraı 13-15% deńgeıinde qalyptasady dep boljap otyrmyz. 2022 jylǵy naýryzdan bastap geosaıası jaǵdaıdyń shıelenisýi jáne Qazaqstannyń qarjy naryǵyna qysymnyń aıtarlyqtaı kúsheıýiniń aıasynda Qazaqstanda ınflásıa údeı túskenin eskergen jón. Reseı Federasıasyna qarsy sanksıalarǵa baılanysty jahandyq jetkizilim tizbegindegi problemalardyń shıelenisýi álemdegi óndiris qunynyń qymbattaýyna alyp keldi. Sheshim qabyldaǵanda biz osy faktorlardyń barlyǵyn eskeremiz», - dedi ol Ulttyq bank saıtynda jarıalanǵan suhbatta.
Onyń paıymynsha, bazalyq mólsherlemeniń saqtalýy ınflásıany báseńdetpek.
«Orta merzimdi kezeńde ınflásıany báseńdetý maqsatymen ınflásıamen kúrestiń jáne ekonomıkanyń ósýi arasyndaǵy teńgerimdi eskere otyryp, biz bazalyq mólsherlemeni 14% deńgeıinde saqtap qaldyq. Bazalyq mólsherlemeniń joǵary bolýy kontrsıkldik búdjet saıasatymen jáne syrtqy ınflásıalyq qysymnyń álsireýimen birge 2023 jyly ınflásıanyń 7,5-9,5%-ǵa deıin baıaýlaýyna yqpal etedi», - dep túsindirdi Ulttyq bank basshysy.
Buǵan deıin QR Premer-Mınıstriniń orynbasary – Qarjy mınıstri Erulan Jamaýbaev bazalyq mólsherleme deńgeıin qaıtadan qaraý kerek degen ustanym aıtqan bolatyn.