Bul jumys eki jylda aıaqtalady.
Aýyl sharýashylyǵy jerlerin sıfrlandyrý jedeldetiledi. Bul týraly Senatta Aýyl sharýashylyǵy vıse-mınıstri Baǵlan Bekbaýov málim etti, dep habarlaıdy Almaty-akshamy.kz QazAqparatqa silteme jasap.
«Memleket basshysynyń jerdi aýyl sharýashylyǵyna tartý jónindegi tapsyrmasyna sáıkes, jerdi qashyqtan zondtaý arqyly aýyl sharýashylyǵy jerlerin paıdalaný boıynsha memlekettik baqylaýdy júzege asyrýǵa múmkindik beretin ǵarysh monıtorıńi júıesiniń qanatqaqty jobasy ótti. Osy jobanyń aıasynda qazir pılotty óńirlerdiń ǵarysh monıtorıńi qorytyndysy boıynsha 8,3 mln gektarǵa tarta paıdalanylmaıtyn jer anyqtalyp, onyń ishinde 2,6 mln gektar jaıylym jeri kelisken túrde memleket menshigine qaıtaryldy. Bul baǵyttaǵy jumystar ary qaraı jalǵastyrylyp jatyr», - dedi B. Bekbaýov Senattaǵy sıfrlandyrý tehnologıalaryn aýyl sharýashylyǵyna endirý taqyrybyndaǵy dóńgelek ústel otyrysynda.
Onyń aıtýynsha, qazirgi kezde sıfrlandyrýǵa arnalǵan ári talap etiletin aýyl sharýashylyǵy jerleriniń 39 paıyzy sıfrlandyrylǵan.
«Qazirgi tehnologıalardy qoldana otyryp, qalǵan 61 paıyz jer bóligin biz 5 jylda sıfrlandyryp, meńgeremiz dep josparlaǵan edik. «Qazaqstan Ǵarysh sapary» ulttyq kompanıasymen birlesken jumystyń nátıjesinde bul jumysty eki jylda aıaqtamaqpyz. Iaǵnı bes jyldan eki jylǵa qysqartamyz», - dedi vıse-mınıstr.