Bul baǵdardy odan ári damytý týraly birlesken deklarasıaǵa qol qoıyldy.
Qazaqstan Úkimeti janyndaǵy Daǵdarysqa qarsy sharalar jónindegi jedel shtab otyrysynda Indýstrıa jáne ınfraqurylymdyq damý mınıstri Qaıyrbek Óskenbaev Transkaspıı halyqaralyq kólik baǵdaryn damytý boıynsha júrgizilip jatqan jumystar týraly aıtty, dep habarlaıdy Almaty-akshamy.kz.
QR IIDM basshysy Transkaspıı halyqaralyq kólik baǵdaryn (THKB) damytý máselesi Mınıstrliktiń turaqty baqylaýynda ekenin atap kórsetti. Qazir onyń áleýetin arttyrý boıynsha belsendi jumystar júrgizilip jatyr.
«2022 jyly bul baǵytta 30 myńnan astam JFE tasymaldaý bekitilgen. Qazirgi jaǵdaıdy eskere otyryp, ol 2 ese ulǵaıýy múmkin. Qazaqstandyq eksporttaýshylar bıyl THKB-ge basqa baǵyttardan 2 mln tonnaǵa deıin júk jóneltýdi josparlap otyr. Onyń ishinde munaı ónimderi, metal ónimderi jáne kómir bar. Tıisti kólemdi 4 mln tonnaǵa deıin arttyrýǵa bolady», - dedi mınıstr.
Qaıyrbek Óskenbaevtyń aıtýynsha, THBK boıynsha eki baǵytta 10 mln tonnaǵa deıin, onyń ishinde 200 myń konteınerge deıin tasymaldaýǵa bolady. Olar: Aqtaý/Quryq – Baký(Alát) – Ázirbaıjan temirjoldary – Grýzıa temirjoldary - Batýmı/Potı porty jáne ári qaraı Qara teńizdegi Varna/Býrgas (Bolgarıa) nemese Konstansaǵa (Rýmynıa);
Aqtaý/Quryk – Baký (Alát) – Ázirbaıjan temirjoldary – Grýzıa temirjoldary (Baký-Tbılısı-Kars baǵyty) – Túrkıanyń Qara teńizdegi jáne Jerorta teńizdegi porttary arqyly.
Sondaı-aq, mınıstr boljanǵan kólemdi tasymaldaý úshin 2022 jylǵy 9-10 naýryzda QR IIDM Ázirbaıjannyń Sıfrlyq damý jáne kólik mınıstrliginiń jáne Grýzıanyń Ekonomıka jáne turaqty damý mınıstrliginiń ókilderimen kezdesýler ótkizgenin habarlady.
Baký qalasynda múddeli mınıstrlikter Transkaspıı halyqaralyq kólik baǵyty boıynsha 2022 jylǵa arnalǵan tasymal josparyn talqylap, avtomobılmen oryndalatyn júk tasymaldaryn damytý jáne THKB damytý úshin birlesken kásiporyn qurý týraly ýaǵdalasty. Birlesken kásiporyn tarıf belgileý jáne júkterdi deklarasıalaý máselelerin sheshýge, biryńǵaı IT sheshimder qoldanýǵa jáne atalǵan baǵytta tranzıt júkterdi shoǵyrlandyrýǵa múmkindik beredi. Sondaı-aq, ýaǵdalastyqty iske asyrý úshin arnaıy jumys tobyn qurý týraly sheshim qabyldandy.
«Tbılısı qalasynda ótken kezdesýde Grýzıa tarapy THKB-ny ilgeriletý úshin birlesken logıstıkalyq kompanıa qurý jónindegi qazaqstandyq bastamany qoldady. Kezdesý qorytyndysynda bul baǵdardy odan ári damytý týraly birlesken deklarasıaǵa qol qoıyldy», - delingen mınıstrliktiń baspasóz qyzmetiniń habarlamasynda.