Zań jobasynda aldymen azamattardyń qaýipsizdigin qamtamasyz etýge basymdyq berilip otyr.
Májilis depýtattary “Jasandy ıntellekt týraly” zań jobasyn birinshi oqylymda maquldady, dep habarlaıdy aqshamnews.kz
"Ekinshiden, zań osy saladaǵy ázirleýshiler men ınvestorlar úshin túsinikti jáne ashyq "oıyn erejelerin" jasaıdy. Úshinshiden, zań jobasy ekonomıkada jasandy ıntellektti engizý kezinde memlekettiń rólin aıqyndaıdy", - deıdi depýtat Ekaterına Smyshláeva.
Onyń aıtýynsha, zań jobasynyń mańyzdy bóligi – ulttyq jasandy ıntellekt platformasy. Bul jasandy ıntellekt ónimderin ázirleý men qoldanýǵa arnalǵan biryńǵaı ınfraqurylym bolady.
"Sondaı-aq, salaǵa qatysýshylardyń quqyqtary men mindetteri naqtylanady. Jasandy ıntellekt júıe ıeleri óz júıelerin paıdalaný sharttaryn belgileı alady, óz quqyqtaryn qorǵaı alady jáne táýekelderdi basqara alady. Al paıdalanýshylar derbes derekterdi qorǵaýǵa, jasandy ıntellekt júıeleriniń jumysy týraly habardar etýge jáne avtomattandyrylǵan sheshimderge daý aıtý múmkindigine ıe bolady", - dedi Smyshláeva.
Budan bylaı jasandy ıntellekt júıeleri táýekel deńgeıine qaraı jikteledi. Al keıbir júıelerdi qoldanýǵa tyıym salynady.
Búgin májilis depýtattary zań jobasyn birinshi oqylymda qabyldady. Alda taǵy ekinshi oqylym bar.