78460 áskerı bólimi men Radıoelektronıka jáne baılanys áskerı-ınjenerlik ınstıtýtynda áskerı qyzmetshilerdi shyǵaryp salý rásimi ótti.
Ótken kóktemde áskerge shaqyrylǵan merzimdi qyzmettiń júzden astam sarbazy úılerine qaıtty, dep habarlaıdy aqshamnews.kz.
Saltanatty jaǵdaıdaǵy shyǵaryp salý rásimi, Jaýyngerlik týmen qoshtasý jáne komandırlerdiń izgi tilekteri jaýyngerlerdiń esinde qalmaq.
Áskerı qyzmetshilerge Almaty qalasy men Almaty oblysy boıynsha sarbazdar analary komıtetiniń ókili Tatána Tropına sóz sóıledi.
– Dál bir jyl buryn men senderdiń ant bergenderińe kýá boldym. Qyzmet barysynda biz dostasyp, jaqyn týystardaı bolyp kettik. Azamattyq ómirde árqaısyńa sáttilik tileımin, – dep atap ótti ol.
Úlgili áskerı tártibi men jaýyngerlik daıyndyqtaǵy jaqsy kórsetkishteri úshin birqatar sarbazdarǵa kezekti áskerı ataqtar berildi, gramotalarmen jáne estelik syılyqtarmen marapattalyp, ata-analaryna alǵys hattar joldandy.
– Sender áskerde tártipke baǵynyp, áskerı bilimge úırendińder. Sol arqyly Otandy qorǵaýǵa daıyn sanaly adam bolyp qalyptastyńdar, – dedi Radıoelektronıka jáne baılanys áskerı-ınjenerlik ınstıtýtynyń bastyǵy general-maıor Nurtas Qabaqov.
Esterińizge sala keteıik, Qorǵanys mınıstrligi áskerge shaqyrylýshylar arasynda motıvasıany arttyrýǵa baǵyttalǵan «Srochnıkı 2.0» memlekettik baǵdarlamasyn iske asyrýǵa erekshe nazar aýdaryp otyr. Sonyń arqasynda sarbazdar grantpen áskerı jáne azamattyq joǵary oqý oryndarynda oqýǵa múmkindik aldy. Bıylǵy jyly bul joba tegin oqytýmen qatar jataqhanamen jáne shákirtaqymen qamtamasyz etýdi kózdep otyr.