Lıonel Messı kezekti ret álemniń eń úzdik fýtbolshysy atandy.
Saltanatty shara Fransıanyń Parıj qalasynda ótti. Kópshiliktiń daýys berý nátıjesinde 36 jastaǵy argentınalyq sportshy atalmysh júldege qol jetkizdi, dep habarlaıdy Almaty-akshamy.kz 24.kz-ke silteme jasap.
Messıden bólek, úzdik úshtikke «Manchester Sıtı» komandasynyń oıynshysy Erlıng Holand pen PSJ komandasynyń shabýylshysy Kıllıan Mbappe kirdi. Sondaı-aq madrıdtik «Real» fýtbolshysy Djýd Bellıngem 21 jasqa deıingi úzdik oıynshyǵa tabystalatyn «Kopa» júldesine ıe boldy. Al jyldyń eń úzdik qaqpashysy ataǵyn Argentına quramasy sapyndaǵy Emılıano Martınes aldy. Erlıng Holand bolsa úzdik shabýylshyǵa beriletin «Gerd Múller» júldesin ıelendi. Áıelder arasynda «Barselona» oıynshysy Aıtana Bonmantı «Altyn dop» ıegeri boldy. Oǵan qosa «Barselona» áıelder komandasy arasynda jyldyń úzdik klýby atandy. Erler arasynda atalmysh marapatqa «Manchester Sıtı» ıe boldy.
«8 birdeı «Altyn dobym» bar jáne men úshin árqaısysynyń orny erekshe. Bıyl komandamyzdyń jetistikteri eskerildi. Iaǵnı, aldymen Amerıka kýbogynda, artynsha Álem chempıonatynda top jardyq. Sondyqtan bul – komandanyń júldesi. Onsyz qol jetkize almas edim. Ulttyq quramadaǵy jigittermen birge barlyq qıyndyqty eńserdik. Endi jemisin kórip jatyrmyz», - deıdi «Altyn dop» syılyǵynyń ıegeri Lıonel Messı.