Úsh aýysymdyq, apatty mektepterdiń máselelerin júıeli sheshý maqsatynda memleket jańa mektepterdi paıdalanýǵa berý boıynsha josparly jumystar júrgizýde.
Bıylǵy jyldyń 1 qazanyna deıin elimizde 78,5 myń oryndyq 77 mektep ashyldy, dep habarlaıdy Almaty-akshamy.kz QR Oqý-aǵartý mınıstrliginiń baspasóz qyzmetine silteme jasap.
Osy jyldyń sońyna deıin túrli qarjy kózderi esebinen 132 myń orynǵa arnalǵan 154 mektepti, onyń ishinde Bilim berý ınfraqurylymyn qoldaý qory esebinen 76 738 oryndyq 62 mektepti paıdalanýǵa berý josparlanýda. Bul 12 apatty jáne 29 úsh aýysymdy mekteptiń máselesin sheshedi. Jańa mektepterdiń basym bóligi Túrkistan oblysynda – 16, Batys Qazaqstan oblysynda– 14, Astana qalasynda – 10, Qyzylorda jáne Jambyl oblystarynda 7 mektepten salynady.
Budan basqa «Jaıly mektep» ulttyq jobasy júzege asyrylýda. Bıyl 217 mekteptiń qurylysy bastalyp, olar 2024 jyldyń sońyna deıin paıdalanýǵa beriledi. Ulttyq joba birinshi kezekte qalalar men keleshegi bar eldi mekenderde jańa úlgidegi mektepter salýǵa, oqýshylar men pedagogter úshin jaıly ári qaýipsiz orta qalyptastyrýǵa, bilim berý qyzmetiniń sapasyn arttyrýǵa baǵyttalǵan. Memleket basshysynyń tapsyrmasy boıynsha elimizde barlyǵy 740 myń oryndyq 369 jaıly mektep salý josparlanǵan.