Aqshamnews.kz redaksıasy "Kún sany" aıdarynda aptanyń eń mańyzdy derekterine sholý jasady.
Memlekettik rámizderge – 33 jyl
4 maýsymda Qazaqstan Respýblıkasynyń Memlekettik rámizderine 33 jyl toldy. 1992 jyly dál osy kúni Táýelsiz Qazaqstannyń Týy, Eltańbasy jáne Ánurany resmı túrde qabyldandy
"Baıqońyr" ǵarysh aılaǵynyń qurylǵanyna 70 jyl toldy
Memleket basshysy Qasym-Jomart Toqaev bul kúnmen quttyqtady.
"1957 jyly dál osy aradan jasandy Jer serigi ushyrylyp, ǵaryshty ıgerý dáýiri bastaldy. Kóp uzamaı, 1961 jyly aılaqtan tuńǵysh ǵaryshker Iýrıı Gagarın kók júzine attandy. Bul tarıhı oqıǵa jahan jurtshylyǵyn biriktirip, adamzattyń ǵylym men órkenıet progresine degen senimin nyǵaıtty. Sodan beri Baıqońyrdan myńdaǵan Jer serigi ushyrylyp, ondaǵan mısıa oryndaldy. Munda kórnekti ǵalymdar, konstrýktorlar men ınjenerler jumys istedi. Uly jetistikterdiń bastaýynda turǵan barlyq mamanǵa sheksiz rızashylyǵymdy bildiremin!" - dedi Prezıdent quttyqtaýynda.
Bıyl 143,2 myń adam jumysqa ornalastyrylǵan
Bul týraly eńbek jáne halyqty áleýmettik qorǵaý mınıstri Svetlana Jaqypova Memleket basshysy Qasym-Jomart Toqaevqa bergen esebinde aıtty.
- Mınıstr málimetinshe,
bıylǵy 1 mamyrǵa deıin 157,8 myń adamdy eńbekpen qamtý sharalary júrgizilgen; - 143,2 myń azamat jumysqa ornalastyrylǵan;
- jyl basynan beri 232 myńnan astam adamǵa ataýly áleýmettik kómek kórsetilgen.
"Qazaqstan balalary" onkúndigine 5 mıllıonnan asa bala qatysty
Halyqaralyq balalardy qorǵaý kúni qarsańynda elimizde alǵash ret keń aýqymdy "Qazaqstan balalary" atty onkúndiginiń aıasynda 45 myńnan asa túrli is-shara uıymdastyrylyp, olarǵa 5,6 mıllıonnan astam bala qatysty.
Bıyl 216 myńnan asa bala 1-synypqa qabyldanǵan
1 sáýirden bastap 1-synypqa qujat qabyldaý bastaldy. Búgingi kúnge deı̆in elimizdiń mektepterine 216 121 bala qabyldandy, olardyń 70%-y memlekettik tilde oqýdy tańdaǵan.
Qazaqstanda 660 myńnan asa adam ulttyq sportpen aınalysaly
2024 jyldyń qorytyndysy boıynsha ulttyq sport túrlerimen turaqty túrde aınalysatyn qazaqstandyqtardyń sany 660 myńnan asty. Bul — elimizde dene shynyqtyrý jáne sportpen aınalysatyndardyń jalpy sanynyń 9,6 paıyzy (2023 jyly — 619,2 myń adam nemese 8,7%). Jattyqtyrýshylar quramy 1781 mamandy qamtıdy, onyń ishinde 1004-i aýyldyq jerlerde jumys isteıdi.
Eń tanymal sport túrleri:
• qazaqsha kúres,
• toǵyzqumalaq,
• asyq atý,
• kókpar,
• báıge,
• teńge ilý,
• jamby atý,
• aýdaryspaq,
• qusbegilik,
• dástúrli sadaq atý,
• jekpe-jek jáne basqa da túrler.