Almaty qalasy boıynsha UQKD jáne qalalyq PD uıymdasqan qylmysqa qarsy kúres basqarmasy qyzmetkerleri jańa týǵan sábılerdi satýmen aınalysqan qylmystyq toptyń áreketin áshkereledi, – dep habarlaıdy aqshamnews.kz Polisia.kz-ke silteme jasap.
Bar derekterge sáıkes, bul qylmystyq tizbek sońǵy birneshe jyl boıy áleýmettik jeliler arqyly uıymdastyrylyp kelgen.
Qaskóılerdiń negizgi maqsaty – áleýmettik jaǵynan osal toptaǵy áıelderden, sonyń ishinde shetel azamattarynan týǵan sábılerdi satyp alýǵa nıetti adamdarǵa zańsyz jolmen berýdi uıymdastyrý bolǵan. Jedel is-sharalar barysynda jańa týǵan ul balany qomaqty aqshaǵa satý áreketi qujattalǵan. Aqsha berý kezinde kúdiktiler qylmys ústinde ustaldy. Sábı memleket qamqorlyǵyna berilip, tıisti mekemege ornalastyryldy. Atalǵan derek boıynsha qylmystyq is qozǵaldy. Kúdiktiler qamaýǵa alyndy. Tergeý amaldary júrgizilýde, sondaı-aq eldiń basqa óńirlerinde osyǵan uqsas epızodtardyń bolýy múmkindigi tekserilýde.
"Bul – bir rettik áreket emes. Munda turaqty, tipti óńiraralyq baılanystary bar tizbektiń bar bolýy múmkin ekenin joqqa shyǵarmaımyz. Barlyq qatysy bar adamdy anyqtaý jumystary jalǵasýda. Balalarǵa, ásirese jańa týǵan sábılerge qatysty zańsyz áreketter – bul erekshe qatygez jáne aýyr qylmys. Mundaı árbir derek zań aıasynda ádil baǵasyn alady", – dedi Almaty qalalyq polısıa departamenti bastyǵynyń birinshi orynbasary Kýatbek Naýatov.