Almatyda kóshi-qon zańnamasyn buzǵan sheteldikter jaýapqa tartyldy, - dep habarlaıdy aqshamnews.kz Polisia.kz-ke silteme jasap.
Almatyda kóshi-qon zańnamasyn buzýshylyqtardy anyqtaý jáne kóshi-qon jaǵdaıyn turaqtandyrýǵa baǵyttalǵan "Zańsyz kelýshi - 2025" respýblıkalyq jedel-profılaktıkalyq is-sharasy jalǵasýda. Sharanyń úsh kúninde Qazaqstanda bolý jáne jumysqa ornalasý erejelerin buzǵan 548 adam ákimshilik jaýapkershilikke tartyldy. Onyń ishinde 527 shetel azamaty Qazaqstan Respýblıkasynan shyǵaryldy. Elimizde bolý erejesin buzǵan 362 sheteldik, sheteldikterdiń Qazaqstan Respýblıkasynda bolý tártibin buzǵan 164 qabyldaýshy tarap, sheteldik jumys kúshin zańsyz tartqan 22 jumys berýshi jaýapqa tartyldy. TMD elderinen kelgen 282 shetel azamatynyń Almatyda ýaqytsha bolý merzimi qysqartyldy. Kóshi-qon zańnamasyn óreskel buzǵany úshin sot sheshimimen 72 sheteldik Qazaqstan Respýblıkasynan shyǵaryldy.
"Kóshi-qon jaǵdaıyn baqylaý - bizdiń qyzmetimizdiń basym baǵyttarynyń biri bolyp tabylady. "Zańsyz kelýshi" JAİ aıasynda kóshi-qon polısıasy, patrúldik qyzmet, ýchaskelik ınspektorlardan quralǵan mobıldi toptar kún saıyn qala kóshelerine shyǵady. Biz tek sheteldikterdiń ózderi tarapynan ǵana emes, sonymen qatar Qazaqstan Respýblıkasynyń zańnamasyn tolyq oryndamaıtyn qabyldaýshylar men jumys berýshilerdiń tarapynan da zań buzýshylyqtardy anyqtaımyz. Bul keshendi jumys, qoǵamdyq qaýipsizdikti jáne Zań talaptaryn saqtaýdy qamtamasyz etýge baǵyttalǵan", - dedi, Almaty qalalyq polısıa departamenti kóshi-qon qyzmeti basqarmasynyń bastyǵy Erkin Amantaev.