Ulttyq bank azamattardy saq bolýǵa shaqyrdy, sebebi alaıaqtar jalǵan qujattar men rekvızıtterdi, sondaı-aq, jalǵan mobıldi qosymshalar men áleýmettik jelidegi paraqshalardy paıdalanyp, aldaýy múmkin, dep habarlaıdy aqshamnews.kz
"Alaıaqtardyń kózdeıtini - azamattardyń jeke shotyna, depozıtine, aqsha aýdarymdaryna qol jetkizý jáne atyna onlaın nesıe nemese mıkrokredıt rásimdeý", - dep eskertti Ulttyq bank ókilderi.
Olar ózin Ulttyq banktiń, memlekettik nemese quqyq qorǵaý organdarynyń, ekinshi deńgeıli bankterdiń, uıaly baılanys operatorynyń nemese komýnaldyq qyzmettiń qyzmetkerimiz dep tanystyrýy múmkin. Sondaı-aq, azamattarǵa túrli syltaýmen habarlasyp, jalǵan qujattar men bankke aqsha aýdarýǵa arnalǵan rekvızıtter jiberýi de yqtımal.
"Alaıaqtar sizge kelgen SMS habarlamany, rastaý kodyn jiberýdi, kúmándi siltemelerge kirip, túrli qosymshalardy júktep alýdy nemese messendjerdegi jańa fýnksıalardy iske qosýdy suraıdy. Onyń bári - telefonyńyzdaǵy barlyq aqparatqa qol jetkizý úshin jasalatyn qýlyq. Ulttyq bank azamattardy barynsha saq bolýǵa shaqyrady. Kez kelgen qońyraý, hat, habarlama nemese suraý salǵan kezde onyń ras-ótirigin mindetti túrde tekserip alǵan jón. Kúmándi siltemelerge ótpeńiz, ózińiz bilmeıtin qosymshalardy telefonǵa júktemeńiz jáne beıtanys adamdardyń shotyna aqsha aýdarmańyz", - dep jazylǵan habarlamada.
Ulttyq bank málimetinshe, bank qyzmetkerleri jeke tulǵalarǵa eshqashan aýdıo jáne vıdeoqońyraý shalmaıdy, jeke shottaryn júrgizbeıdi, qandaı da bir ınvestısıalyq qorlarǵa nemese qarjy ónimderine ınvestısıa salýǵa shaqyrmaıdy, qarajatty saqtandyrmaıdy jáne halyqpen aqshalaı esep aıyryspaıdy.
"Alaıaqtarǵa tap bolsańyz, dereý Qazaqstan Respýblıkasynyń quqyq qorǵaý organdaryna júginip, aryz jazýǵa keńes beremiz. Qosymsha keńes alý úshin 1477 qysqa nómiri arqyly Ulttyq banktiń baılanys ortalyǵyna habarlasa alasyz", - dep jazylǵan habarlamada.