Infeksıaǵa shaldyqqan memleketter tizimin AQSH, Indıa jáne Brazılıa bastap otyr.
COVID-19 shaldyqqandar sany kóbeıip jatyr. Bul dertke shaldyqqandar sany álem boıynsha 200460325 adamdy quraıdy, kóz jumǵandar sany 4263352 jetken, dep habarlaıdy Almaty-akshamy.kz COVID-19 taralýyna jol bermeý jónindegi VAK-ǵa silteme jasap.
Iran
Iranda COVID-19 juqtyrý jaǵdaılarynyń táýliktik ósýi boıynsha antırekord tirkeldi - indetke shaldyǵýdyń 39 019 deregi jáne 378 kóz jumý jaǵdaılary anyqtaldy. Koronavırýspen aýyrǵandardyń jalpy sany 3 979 727 adamdy quraıdy. Al kóz jumý jaǵdaılarynyń sany 91 785-ke jetti, - dep habarlaıdy Irannyń Densaýlyq saqtaý jáne medısınalyq bilim mınıstrligi. Medısınalyq bılik elde “delta” shtamynyń taralýy aıasynda taǵy da shekteýler qoıdy. 3 tamyzdaǵy jaǵdaı boıynsha, 10 741 956 adam koronavırýsqa qarsy vaksınanyń birinshi dozasyn aldy, al 2 844 250 adam tolyq egildi.
Fransıa
Fransıada Jerorta teńiziniń Korsıka aralynda tótenshe jaǵdaı rejımi engizilýi múmkin. Ótken demalys kúnderi bul jerge 130 000-nan astam demalýshy keldi. Araldyń eki negizgi qalalarynyń biri - Bastıadaǵy aýrýhanalardyń tolýy 79%-dan asty. Úkimet taǵy da aýrýhana qyzmetkerlerine qosymsha jumysy úshin ústeme aqy, sondaı-aq aýyr jumys saldarynan ala almaıtyn aqyly eńbek demalysy úshin ótemaqy engizetinin málimdedi. Infeksıa taralýynyń ósýine baılanysty eldiń barlyq jaǵalaýdaǵy kýrorttarynda mindetti túrde maska kıý jáne túngi komendanttyq saǵat engizildi.
Izraıl
Izraıl COVID-19 vırýsymen aýyrǵandar sanynyń kóbeıýine jáne “delta” shtamynyń taralýyna baılanysty taǵy da qatań karantınge kóshýde. 8 tamyzdan bastap 100-den asa adam bolatyn jabyq úı-jaıdaǵy qoǵamdyq oryndarda "Densaýlyq ruqsattamalary" engiziledi. Sondaı-aq azamattardy ashyq aýada ótetin is-sharalar kezinde qorǵanys maskalaryn kıýge mindetteıdi. Koronavırýsqa qarsy vaksına qabyldaǵanyna qaramastan, elge oralǵan týrıser mindetti 7 kúndik karantınge jiberiledi. Jańa shekteýler Mınıstrler kabınetiniń otyrysynan keıin jeksenbide kúshine enedi.
Vetnam
Vetnamda turǵyndar arasynda koronavırýstyń taralýy áli de jalǵasýda. Munda táýligine 8 429 COVID-19 ınfeksıasyn juqtyrýdyń jańa jaǵdaılary tirkeldi. Onyń ishinde 8 377 - jergilikti sıpatta, 52 - shetelden tasymaldanǵan. Jergilikti sıpattaǵy jańa jaǵdaılarynyń ishinde 4 171-i Hoshımın qalasynda anyqtaldy, bul eldegi KVI taralýynyń epısentri. Qazirgi ýaqytta Vetnamda vırýs juqtyrǵandardyń jalpy sany 170 190 adamdy quraıdy, olardyń 2071-i qaıtys boldy. Densaýlyq saqtaý mınıstrligi qazirgi ýaqytta COVID-19-ǵa qarsy vaksınanyń 7 mıllıonǵa jýyq dozasy qoldanylǵanyn atap ótti.
Qytaı
Ýhanda koronavırýs ınfeksıasyn juqtyrýdyń birneshe deregi anyqtalǵannan keıin qala turǵyndaryn koronavırýs ınfeksıasyna jappaı tekserý bastalady. COVID-19 vırýsyn anyqtaýǵa arnalǵan testileýden 12 mıllıonnan astam turǵyn ótedi. 2020 jyly koronavırýsqa qarsy qatań sharalardyń arqasynda Pekın ınfeksıanyń odan ári taralýyn tez arada toqtatqan bolatyn. Alaıda qazir pandemıanyń jańa kezeńi Qytaıǵa qaýip tóndirdi: shilde aıynyń ortasynan bastap elde ınfeksıanyń 400-den astam jaǵdaıy anyqtaldy.
Reseı
Reseı astanasynda koronavırýstyq ınfeksıa taralýynyń kúrt ósýi tirkeldi. Naýqastar sany úshten bir bólikke artty. Ótken táýlikte - SARS-CoV-2 vırýsyn juqtyrǵan 3 330 adam tirkeldi. Bul aldyńǵy kúnmen salystyrǵanda 816 jaǵdaıǵa kóp. Pandemıa kezinde Máskeýde 1 511 940 ınfeksıa juqtyrý deregi tirkeldi, 25 779 turǵyn kóz jumdy. Reseı Federasıasynda pandemıa bastalǵaly koronavırýstyq ınfeksıanyń 6 312 185 jaǵdaıy tirkeldi, 160 137 adam qaıtys boldy.
Germanıa
Germanıadaǵy koronavırýstyq jaǵdaı týraly Robert Koh ınstıtýty aqparat taratty. Sońǵy 24 saǵat ishinde elde koronavırýstyq ınfeksıasy bar 847 jańa naýqas jáne bir adam qazasy tirkeldi. Pandemıa kezinde Germanıanyń 3 772 109 turǵynynda koronavırýs anyqtaldy. Germanıada COVID-19 dıagnozymen qaıtys bolǵan naýqastardyń sany 91 600 adamdy quraıdy.