Bıyldan bastap jańa Salyq kodeksi kúshine endi. Ózgerister men tolyqtyrýlar engizilgen kodekske saı, burynǵy jeti arnaıy salyq rejıminiń ornyna tek úsheýi ǵana qaldy.
Bul ózgerister shaǵyn ǵana kásibin dóńgeletip otyrǵan kásipkerler úshin de basqa mindetter men júktemeler artty. Tipti aıyna 2 mıllıon teńgeden az tabysqa ıe kásipkerler durys sheshim qabyldamasa, aıyppulǵa nemese qosymsha salyqqa urynýy múmkin.
Osy oraıda shaǵyn bıznes ıeleri úshin qaı salyq rejımi tıimdi, QQS shegi qandaı jáne habarlama berý tártibi qalaı? Bul suraqtardy Aqshamnews.kz tilshisi qarjy sarapshysy Beksultan Arystanbekten surap-bildi.
Kásipkerler úshin salyq rejımin durys tańdaý - bıznestiń turaqty damýyna tikeleı áser etetin mańyzdy sheshim. Qarjy sarapshysy Beksultan Arystanbek shaǵyn kásip ıelerine qoljetimdi rejımder, 2026 jyldan bastap engizilgen ózgerister jáne jıi jiberiletin qatelikter týraly aıtyp berdi.
Sarapshynyń aıtýynsha, tabysy 2 mıllıonnan aspaıtyn kásipkerler úshin úsh negizgi arnaıy salyq rejımi bar.
Birinshisi - ózin-ózi jumyspen qamtýǵa arnalǵan mobıldi rejım. Ol mobıldi qosymsha arqyly rásimdeledi jáne aılyq tabys shegi shamamen - 1,24 mln teńge. Bul rejımde 4% biryńǵaı tólem tólenedi, eseptilik óte jeńil. Alaıda qyzmet túrleri shekteýli jáne jumysshy ustaýǵa tyıym salynǵan. Sondyqtan bul jeke ózi qyzmet kórsetetin mamandarǵa qolaıly.
Ekinshisi - patent negizindegi rejım. Munda jyldyq tabys shegi 14,5 mln teńgege deıin jetedi. Salyq aldyn ala tólenedi, eseptilik barynsha jeńildetilgen. Biraq kásipker tabysyn aldyn ala naqty josparlaýǵa tıis jáne qyzmet túrlerine shekteý bar. Bul kóbine turaqty, maýsymdyq emes shaǵyn bızneske yńǵaıly.
Úshinshisi - ońaılatylǵan deklarasıa negizindegi arnaıy salyq rejımi. Bul rejım eń yńǵaıly bolyp sanalady: jumysshy sanyna shekteý joq, stavka - 4%, al aınalym lımıti óte joǵary. Bıznesti keńeıtýdi, seriktestermen jumys isteýdi kózdegen kásipkerler úshin tıimdi.
Beksultan Arystanbektiń sózinshe, osy deńgeıdegi kásipkerler úshin eń jaǵymdy jaıt - qosylǵan qun salyǵy men áleýmettik salyqtyń tólenbeýi. Negizgi salyq - 4%. Alaıda mindetti áleýmettik tólemder saqtalady: zeınetaqy jarnasy, medısınalyq saqtandyrý jáne áleýmettik aýdarymdar.
2026 jyldan bastap shaǵyn bızneske qatysty birqatar mańyzdy ózgerister kúshine endi. Ońaılatylǵan deklarasıa rejımi saqtaldy, alaıda jergilikti máslıhattar salyq mólsherlemesin 2–6% aralyǵynda ózgerte alady. Sonymen qatar, QQS boıynsha tirkeý shegi 10 000 AEK-ke deıin kóterildi. Bul kóptegen kásipkerge QQS-syz jumys isteýge múmkindik beredi.
Sarapshy eń mańyzdy talapqa erekshe nazar aýdarýǵa keńes beredi: ár jyldyń 1 naýryzyna deıin qoldanatyn salyq rejımi týraly mindetti túrde habarlama berý qajet. Bul talap oryndalmasa, kásipker avtomatty túrde jalpyǵa birdeı salyq rejımine kóshedi. Al bul - joǵary salyq júktemesi men kúrdeli eseptilik degen sóz.
Tabysy belgilengen lımıtten asyp ketken jaǵdaıda da kásipker jedel áreket etýge tıis. Ýaqytynda rejımdi aýystyrmaý aıyppuldarǵa, qaıta esepteýge jáne salyqtyq tekserýlerge ákelýi múmkin.
Sonymen qatar, ońaılatylǵan deklarasıa rejımi keı jaǵdaıda klıent joǵaltý táýekelin týdyrady. Ásirese iri kompanıalarmen jumys isteıtin kásipkerler úshin QQS-tyń bolmaýy qıyndyq keltirýi múmkin. Al jeke tutynýshylarmen jumys isteıtinder úshin bul másele asa ózekti emes.
Qorytyndylaı kele, qarjy sarapshysy salyq rejımin tek esep-qısap retinde emes, bıznes-modeldiń bir bóligi retinde qarastyrý qajet ekenin aıtady.
"Aldyn ala josparlaý men sanaly tańdaý - kásipker úshin eń arzan ári eń durys sheshim", – deıdi Beksultan Arystanbek.