İs-sharalar jalǵasýda.
QR AQDM baspasóz qyzmeti dereginshe, tamyzdyń taqyryptyq jelisi – «Táýelsizdiktiń quqyqtyq negizderi. Quqyq ústemdigi jáne azamattyq qoǵam», dep habarlaıdy Almaty-akshamy.kz. 24.kz-ke silteme jasap.
Bul aıdyń basty oqıǵalary Qazaqstannyń Konstıtýsıa kúni men Halyqaralyq ıadrolyq synaqtarǵa qarsy is-qımyl kúni bolyp tabylady. Eske sala keteıik, mereıtoı tujyrymdamasyna sáıkes ár aı ózindik jeke taqyrypta ótedi. Atap aıtqanda, maýsym patrıotızm jáne memlekettik rámizder taqyryby aıasynda ótse, shilde «Elorda kúni. Nur-Sultan – tabys pen órkendeýdiń sımvoly» taqyrybynda ótti.
Osy jyldyń basynan beri Táýelsizdiktiń 30 jyldyǵyn merekeleýdiń óńirlik josparlary aıasynda elimizde 7 myńnan astam is-shara ótkizildi. Qazaqstan Respýblıkasy Táýelsizdiginiń 30 jyldyǵyn merekeleýdiń tamyz aıyndaǵy kestesi tarıhı damýdyń jalpyulttyq baǵdaryn, sondaı-aq qazaqstandyqtardyń quqyqtyq memleket ıdealdaryna beıildiligin aıqyndaýda Konstıtýsıanyń mán-mańyzyn ashýǵa baǵyttalady.
Memlekettik organdar sanıtarlyq normalarǵa sáıkes túrli is-sharalar, onyń ishinde azamattyq qoǵam ókilderiniń qatysýymen dıalog alańdaryn, sondaı-aq kórmeler, patrıottyq ánderdiń baıqaýlary, jastar arasynda zıatkerlik oıyndar ótkizedi. «Táýelsizdik tarlandary» jobasy aıasynda «Halyq Qaharmany», «Eńbek Eri» ataqtaryna ıe bolǵan qoǵam jáne memleket qaıratkerlerimen onlaın-kezdesýler ótedi. Elimizdiń memlekettik organ basshylarynyń, halyqaralyq uıymdar, basqa elderdiń konstıtýsıalyq ádilet organdary men ǵylymı qoǵamdastyq ókilderiniń qatysýymen Halyqaralyq sımpozıým ótedi. Sonymen qatar bıyl Semeı ıadrolyq polıgonynyń jabylýyna 30 jyl tolady. Esterińizge sala keteıik, bul Qazaqstan Respýblıkasynyń Tuńǵysh Prezıdenti N.Á.Nazarbaevtyń 1991 jylǵy 29 tamyzdaǵy Jarlyǵynyń arqasynda múmkin boldy. Bizdiń elimiz álem tarıhynda planetadaǵy ekinshi iri ıadrolyq synaq polıgonyn jaýyp, qýattylyǵy boıynsha tórtinshi áskerı ıadrolyq arsenaldan óz erkimen bas tartqan birinshi el boldy.
Shyǵys Qazaqstan oblysynda Semeı ıadrolyq polıgony jabylýynyń 30 jyldyǵyna arnalǵan halyqaralyq konferensıa, jyl saıynǵy «Medısına. Radıasıa. Densaýlyq» ǵylymı konferensıasy ótkiziledi, sondaı-aq ıadrolyq synaqtardan zardap shekkenderge arnalǵan eskertkishke gúl qoıý rásimin uıymdastyrý josparlanǵan.