Kóktem jaýyn-shashyndy bolýy múmkin.
Qazgıdromet RMK aldaǵy kóktem jáne jaz aılaryna aýa raıy boljamyn usyndy, dep habarlaıdy Almaty-akshamy.kz
Mamandardyń aıtýynsha, kóktemgi kún raıy jaýyn-shashyndy bolýy múmkin. Al jaz aılarynda aýa temperatýrasy normadan 1-2° joǵary bolýy múmkin dep kútilýde.
Sáýir jáne mamyr aılarynda el aýmaǵynyń basym bóliginde aýanyń ortasha temperatýrasy bir aıdaǵy normadan 1° joǵary bolady dep kútilýde.
Jaýyn-shashyn mólsheri sáýir aıynda respýblıka aýmaǵynyń basym bóliginde normadan kóp bolsa, mamyr aıynda klımattyq norma shamasynda bolmaq.
«Kóktemdegi aýa raıy tosynsyılarǵa toly bolmaq. Óıtkeni ótpeli maýsymdyqta sınoptıkalyq prosester óte turaqsyz. Kaspııdiń ońtústiginen jáne Reseıdiń Eýropalyq aýmaǵynan sıklondardyń áserinen jaýyn-shashyn kútiledi: túngi ýaqytta jańbyr men qar túrinde, kúndiz jańbyr túrinde, al ońtústik aımaqtarda sýyq aýa massalarynyń enýiniń saldarynan úsik bolýy múmkin», delingen Qazgıdromet RMK baspasóz qyzmeti taratqan aqparatta.
Maýsym aıynda aýanyń ortasha aılyq temperatýrasy respýblıkanyń basym bóliginde normadan 1-2° joǵary, ıaǵnı ádettegiden ystyq, eldiń batys bóliginde norma shamasynda bolady dep boljanady.
Shilde, tamyz aılarynda Qazaqstanda aýanyń ortasha aılyq temperatýrasy norma shamasynda, tek tamyzda - eldiń ońtústigi men ońtústik-shyǵysynda normadan 1°joǵary bolady dep kútilýde.
Maýsymdyq aýa raıy boljamy aýa temperatýrasy men jaýyn-shashyn boıynsha ortasha alynǵan meteorologıalyq kórsetkishterdiń, qarastyrylyp otyrǵan maýsymdaǵy klımattyq normadan aýytqý (anomalıa) retinde kórsetilgen sıpattamasy; ony konsýltatıvti retinde paıdalanylýy tıis, ol qysqa merzimdiq (toqsandyq maýsymdyq boljam, aı, onkúndik, apta jáne kún) boljamdarmen naqtylanady.