Kókshetaýda jalǵyzbasty zeınetkerdiń páterinen eki samosval qoqys shyǵaryldy. Qarıanyń ózi aýrýhanaǵa jatqyzyldy, dep habarlaıdy almaty-akshamy.kz QazAqparatqa silteme jasap.
Aqmola oblystyq polısıa departamenti baspasóz qyzmetiniń málimetinshe, Kókshetaý qalasy polısıa basqarmasynyń №4 ýchaskelik polısıa pýnktine Temirjol kóshesinde ornalasqan kóp qabatty turǵyn úıdiń turǵyndary júgingen.
«Oblys ortalyǵy turǵyndary qart áıeldiń páterinde antısanıtarıalyq jaǵdaı ornaýyna baılanysty kórshi turatyn zeınetkerge shara qoldanýdy surady»,-dep atap ótti vedomstvodan.
Memleket basshysynyń Joldaýyn iske asyrý úshin Aqmola oblysynda polısıa jumysynyń servıstik formatyn qamtamasyz etý bóliginde komısıanyń osy meken-jaıǵa shyǵýyn júzege asyrý týraly sheshim qabyldandy.
Jumys tobynyń quramyna polıseılerden basqa, jergilikti atqarýshy organdardyń ókilderi men qalanyń sanıtarlyq-epıdemıologıalyq qyzmetiniń mamandary kirdi. Tekserý barysynda fakt tolyǵymen rastaldy.
«Oblys ortalyǵynyń 72 jastaǵy turǵyny egde jasyna jáne densaýlyq jaǵdaıyna baılanysty páterdi tıisti deńgeıde ustaı almaǵany anyqtaldy. Turǵyn úıde jándikter men kemirgishterdiń paıda bolýyna, sondaı-aq jaǵymsyz ıistiń shyǵýyna yqpal etetin kóptegen turmystyq qaldyqtar tabyldy», - dep tolyqtyrdy vedomstvodan.
Qazaqstan Respýblıkasy Táýelsizdiginiń 30 jyldyǵyna arnalǵan «30 ıgi is» aksıasy aıasynda Kókshetaý qalasy polısıa basqarmasynyń qyzmetkerleri jergilikti atqarýshy organdarmen birlesip barlyq jınalǵan turmystyq qaldyqtardy jınap, keıinnen sanıtarlyq baqylaý qyzmeti úı-jaıdy dezınfeksıalady.
Bólmeni tazartý úshin samosval qoldanyldy. Nátıjesinde eki mashına qoqys jınaldy. Qazirgi ýaqytta páter turǵyny aýrýhanaǵa jatqyzylyp, em alýda.